«Төнге Казан» йөгерешендә биш илдән 4,5 мең спортчы катнашты

ТР башкаласында узган ялларда, 27 һәм 28 июльдә, «Төнге Казан» җиңел атлетика йөгереше узды. Анда Россия, Казахстан, Кипр, Белоруссия һәм Көньяк Африка Республикасыннан 4,5 мең спортчы катнашты.

Спорт бәйрәме өч яшьтән алып 17 яшькә кадәр 600 яшь спортчы арасында йөгерү белән башланып китте. Алар 300 һәм 600 метр, шулай ук 1 км дистанцияләрдә йөгерделәр.

Аннары 5 километрга йөгерү булды. Бу дистанцияне башкалардан тизрәк Кирилл Дятлов (15:43) һәм Алена Еремова (17:40) үттеләр. Төн уртасында 10 километрга йөгерү ярышлары старт алды. Бу дистанциядә Олег Ильин (30:15) һәм Марина Смирнова (35:13) беренчеләрдән булды.

Йөгерүгә шулай ук «Булдыра алганнан күбрәк» фонды карамагындагылар да кушылды, алар, сәламәтлекләре чикләнгән булуга карамастан, күнегүләр ясыйлар һәм ярышларда катнашалар, дип хәбәр иттеләр ТР Спорт министрлыгында.

kzn.ru