Тавыш бирү нәтиҗәләре буенча Казансу яр буендагы балалар паркына «Елмай» исеме бирделәр

ТР башкаласында яшәүче 6,3 меңнән артык кеше Казансу яр буенда ачылачак балалар паркы исеме өчен тавыш бирде. Аларның күбесе «Елмай» вариантын сайлаган. Популярлык буенча икенче урында «Айда парк», ә өченче урында «Су баласы» атамасы. Тавыш бирү ике атна дәвамында KZN.RU порталында уздырылды, дип хәбәр иттеләр аппарат киңәшмәсендә.

«Яңа балалар паркы Казан гаиләләрен җәлеп итә торган тагын бер яңа урын булачак. Анда аларга бергә вакыт уздыру кызыклы булачак, дип ышанам. Иҗтимагый киңлек балаларның һәм ата-аналарның шатлыгын һәм бәхетле елмаюын гына уятыр дип өметләнәбез. «Елмай» исеме озак еллар парк мохитенә һәм берничә буын балаларның кәефенә туры килсен», – диде Казан Башкарма комитеты җитәкчесе Рөстәм Гафаров.

Исегезгә төшерәбез, парк төзелешен Шәһәр һәм Республика көненә тәмамлау планлаштырыла. Хәзер җәмәгать киңлегендә белгечләр монолит эшләрне тәмамлыйлар, яңгыр сулары канализациясе, электр белән тәэмин итү һәм яктырту челтәрләрен җиһазландыралар, су чистарту системасын оештыралар.

«Әкренләп балалар җиһазлары урнаштырыла һәм агачлар утыртыла. Түбәне монтажлау һәм булачак күшәкне бизәү буенча эшләр бара. Түшәлгән таш салу өчен юлларның бетон нигезе әзерләнгән. Казан үсеш институты белән берлектә балалар тематикасын чагылдырачак юнәлеш һәм иҗтимагый киңлекнең стиле эшләнә», – дип хәбәр итте Парклар һәм скверлар дирекциясе җитәкчесе Айгөл Латыйпова. Ул шәһәр халкын һәм кунакларын 30 нчы августта парк ачуга чакырды, анда бу көнне бәйрәм программасы узачак.

Спикер искәрткәнчә, 3,4 гектар мәйданлы яңа иҗтимагый киңлек «УРАМ» экстрим-паркы һәм ТР Милли китапханәсе арасында урнашачак. Яңа яшел зонага балаларны һәм аларның ата-аналарын җәлеп итү эше күптән башланган. Мәсәлән, гыйнварда дүрт яшьтән алып 17 яшькә кадәрге балалар киңлекне файдалы тутыру буенча үз фикерләре белән уртаклашкан, аларның тәкъдимнәре архитекторлар һәм проектлаучылар тарафыннан хупланды һәм булачак паркта кулланылыш тапты. Моннан тыш, апрель аенда балалар мәйданы планының ачык презентациясе узды, анда шәһәр халкы проект белән таныша һәм төзекләндерү һәм җәмәгать киңлеген тутыру темаларына шәхсән сораулар бирә алды.

Халыкны җәлеп итү принцибы исем сайлаганда да кулланылган. Бу эшкә шәһәр берләшмәләре вәкилләре – Казан архитектура-төзелеш университеты студентлары, «АрхиДети» проектында катнашучылар һәм паркның резидентлары кушылды. Халык арасында ачык сораштыруны Вахитов һәм Идел буе районнары администрациясе башлыгы Альберт Салиховның социаль челтәрләрендә күзәтергә була иде. Моннан тыш, Казан рәссамнары һәм активистлары белән очрашулар узды. Ахырда 5 исем финалга кергән: «Су баласы»/«Дети воды», «Юл(а)», «Елмай», «Уен/Игра», «Айда парк»/«Ай-да парк!».

kzn.ru