Татарстанда мобилизацияләнүчеләрнең балаларына бер тапкыр бирелә торган 20 мең сум акча түләнәчәк

Татарстанда мобилизацияләнүчеләрнең балигъ булмаган балаларына бер тапкыр бирелә торган акча билгеләнде. Мобилизацияләнгән кешеләрнең гаиләләреннән һәр бала 20 мең сум акча алачак. Әлеге карарны ТР Премьер-министры Алексей Песошин имзалады.

Документ нигезендә, мобилизацияләнүчеләрнең балаларына бер тапкыр бирелә торган түләү, гражданның кереме күләмен һәм башка ташламалар билгеләү өчен гаиләнең җыелма керемен билгеләгәндә, исәпкә алынмаячак. Мобилизацияләнүчеләрнең балаларына түләү өчен акчалар ТР Министрлар Кабинетының резерв фондыннан алыначак.

Түләүләр ТР Хезмәт, халыкны эш белән тәэмин итү һәм социаль яклау министрлыгы тарафыннан оештырылачак. Мобилизация буенча хәрби хезмәткә чакырылучылар исемлеген Татарстан Хәрби комиссариаты әзерләп, Республика матди ярдәм үзәгенә җибәрәчәк. Бер тапкыр бирелә торган түләүне алу өчен мөрәҗәгать итүче (баланың законлы вәкиле) яшәү урыны буенча компенсация түләүләре үзәгенә, гариза язып, кирәкле документлар белән мөрәҗәгать итәргә тиеш. Документлар исемлеге карарда күрсәтелгән.

Карар 2022 елның 22 нче сентябреннән барлыкка килгән хокук мөнәсәбәтләренә кагыла.

kzn.ru