Татарстан башкаласыннан күп балалы Мотыйгуллиннар гаиләсенә «Ата-ана даны» ордены медале тапшырылды

Кичә Казан Кремлендә Татарстанның 45 күп балалы гаиләләрн хөрмәтләделәр. Биш бала тәрбияләүче ирле-хатынлы Илнур Мотыйгуллин һәм Алия Нуралиева «Ата-ана даны» ордены медален алдылар. Тантаналы кабул итүне Татарстан рәисе Рөстәм Миңнеханов һәм аның хатыны Гөлсинә Миңнеханова үткәрде.

Төбәк башлыгы билгеләп үткәнчә, гаилә – барлык дәүләтнең нигезе, нәкъ менә шуңа күрә гадәти кыйммәтләрне тапшыру һәм зур ныклы гаиләләрнең уңай тормыш тәҗрибәсе белән уртаклашу мөһим. «Гаилә — гореф-гадәтләрне, мәдәниятне, туган телне саклау нигезе ул. Сез ата-ананың бәяләп бетергесез игелекле хезмәтен үз өстегезгә алгансыз. Бу – акыллы балаларны лаеклы тәрбияләү», — дип мөрәҗәгать итте Рөстәм Миңнеханов.

Төп кешелек кыйммәтләре гаиләдә салына, дип саный республика рәисе. Аерым рәхмәт сүзләрен ул махсус хәрби операциядә катнашучыларның әниләренә, хатыннарына һәм башка гаилә әгъзаларына җиткерде: «Сез – аларның ышанычлы тылы һәм таянычы!».

Рөстәм Миңнеханов гаиләләргә дәүләт бүләкләре тапшырды. Алдынгылар арасында Илнур Мотыйгуллин һәм Алия Нуралиева бар иде. Ире «МАВИКАЗАНЬ» ҖЧҖендә баш инженер-конструктор булып эшли, ә хатыны «Демография» илкүләм проектының «Мәшгульлеккә ярдәм итү» федераль программасы буенча график дизайнерлыкка укый. Әти-әниләр дүрт кыз һәм бер ул тәрбиялиләр. Балалар мәктәп чараларында, спорт ярышларында, олимпиадаларда актив катнашалар, түгәрәкләргә йөриләр. Гаилә актив һәм сәламәт яшәү рәвеше алып бара: җәен велосипедта йөри, күлләрдә су коена, кышын шугалакларга йөри. Сәламәтлек, югары әхлаклылык, зыялылык, бер-береңне хөрмәт итү һәм кайгырту — Мотыйгуллиннар гаиләсенең төп тормыш максатлары.

Төбәк башлыгы шулай ук Азнакай районыннан Фирүзә Шәриповага, Әлмәт районыннан Фәния Кәримовага, Лениногорск районыннан Мария Псурцевага, Тукай районыннан Гүзәлия Гыйльфановага һәм Чирмешән районыннан Нина Андреевага «Ана даны – Материнская слава» медальләрен тапшырды, дип хәбәр иттеләр ТР Рәисе матбугат хезмәтендә.

kzn.ru