Татарстан башкаласында исерек шоферлар катнашындагы юл-транспорт һәлакәтләре өчтән бергә кимегән

Казанда быел исерек шоферлар гаебе белән булган 16 юл-транспорт һәлакәте теркәлгән, бу узган елның шул ук чоры күрсәткечләреннән 36% ка кимрәк. Аварияләрдә 19 кеше зыян күргән, чагыштыру өчен, 2022 елда – 31. Бер үлгән кеше бар.

«Аварияләр күрсәткечләренең кимүе оптимизм өчен сәбәп бирми – исерек хәлдә транспорт чаралары белән идарә итүче машина йөртүчеләр саны кимеми», – дип билгеләп үтте Казан буенча Эчке эшләр идарәсе дәүләт автоинспекциясенең оештыру-аналитика эше бүлеге башлыгы Алла Новикова. Мәсәлән, инспекторлар исерек шоферларга карата 1640 административ материал төзегән, РФ Җинаять кодексының 264.1 маддәсе буенча 135 җинаять эше кузгатылган.

Машина йөртүчеләрнең исереклек килеш идарә итүләре турындагы мәгълүматны @Kazan_bezopasnoBot Telegram-ботына хәбәр итәргә мөмкин. Быел битараф булмаган казанлылар 58 хәбәр җибәргән, аларны тикшергәннән соң 17 исерек шофер тоткарланган.

Казанның Дәүләт автоинспекциясендә билгеләп үтүләренчә, шоферның кеше сәламәтлегенә авыр зыян китергән яки кеше үлеменә китергән алкоголь исереклеге – катлаулы хәл. Мондый хокук бозу биш елдан 15 елга кадәр иректән мәхрүм итү белән җәзалана.

KZN.RU