«Татар сүзе» IV Халыкара нәфис сүз телевизион бәйгесенең җиңүчеләре билгеле

Чара Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән «Татарстан - Яңа Гасыр» телерадиокомпаниясе тарафыннан оештырыла.

Җиңүчеләрне Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе җитәкчесе Марат Әхмәтов котлады:

«Биредәге матур бәйге – туган телебез бәйрәме. Бу – безнең бөек Тукаебызның туган көнендә үтәчәк туган тел көненә зур бүләк булсын иде. Әлеге эчкерсез, телгә мәхәббәт белән сугарылган мохитне без һәрберебез үз язмышыбыз белән озата барып, аны яшәү рәвешенә кертеп, алдагы буыннарга да тапшырырга тиешбез.

Безнең белән бүген арабызда булмаган әдәбият шәхесләре бу мохиттә утырсалар, ничек сөенерләр иде. Бүгенге бәйрәмебез аларга дога булып барып ирешсен. Быелгы бәйгедә бик күп ачышлар бар, берсеннән-берсе камилрәк чыгышлар ишетәбез. Һәрбер катнашучыга рәхмәтлемен. Һәрбер чыгыш ясаучы безгә бик кадерле. Күпме гасырлар буе сынаулар үткән безнең халкыбызның теле дә үзенең нинди матурлыгын саклый белгән. Нинди гүзәл минем газиз халкым!» - диде ул.

Быел бәйгедә 3000 кеше катнашып, татар әдәби әсәрләрен сәнгатьле сөйләүчеләр комиссия хөкеменә шигърият, проза жанрлары һәм «Туган тел» махсус номинациясе буенча үзләренең бәйге эшләрен тәкъдим итте. Шуларның 37се җиңүче исеменә лаек дип табылды.

Җиңүчеләр исемлеге:

7 яшькә кадәрге катнашучылар арасында
«Шигърият»:
I урын – Минһаҗева Сәминә Раушан кызы – Г.Тукай «Туган тел» (Чаллы)
II урын – Гатауллин Әмир Динар улы – Ш.Галиев «Телевизор булды баш» (Чаллы)
II урын – Садыйкова Самирә Руслан кызы – Р.Корбан «Туган тел» (Питрәч)
III урын – Мәгъсүмҗанова Нәфисә Илшат кызы – Ш.Галиев «Сиңа әйтәм» (Казан)

«Проза»:
III урын – Заһидуллина Ралинә Марсель кызы – А. Гыймадиев «Селфи таягы» (Казан)

8-13 яшьлек катнашучылар арасында
«Шигърият»:
I урын – Хөсәенов Рөстәм Рәхимҗан улы – И.Юзеев «Татар моңы» (Казан)
II урын – Яппаров Рамил Илдар улы – Җ.Дәрзаман «Тәнәфес» (Балтач)
III урын – Бариева Мәликә Руслан кызы – М. Җәлил «Яшь ана» (Казан)

«Проза»:
I урын – Гарифҗанов Сәйдәш Шамил улы – В. Нуриев «Инша» (Казан)
II урын – Хайбрянова Рузалина Рузил кызы – М.Юныс «Шәмдәлләрдә генә утлар яна» (Актаныш районы, Иске Байсар авылы)
III урын – Баһаутдинов Денис Азат улы – А.Гыймадиев «Тормозлары шәп иде» (Азнакай)

14-17 яшьлек катнашучылар арасында
«Шигърият»:
I урын – Зәкиева Камилла Эльвир кызы - халык авыз иҗаты «Сөембикә» бәете (Казан)
II урын – Кәлимуллина Гөлия Раузит кызы – Ф.Яруллин «Үзенә йотып иң зур хәбәрен» (Әтнә районы, Күәм авылы)
III урын – Трутнев Кәрим Артур улы – Р.Вәлиева, Ә.Ситдыйкова «Моңлы җырым минем халкымнан» (Пермь крае, Барда районы)
III урын – Исрафилов Әмир Булат улы - Р.Вәлиева «Замана баласы» (Балтач)

«Проза»:
I урын – Әһлиуллин Аяз Әнис улы – Л.Ихсанова «Наил һәм Фаил» (Казан)
II урын – Шәрипова Азалия Рафис кызы – А.Гыйләҗев «Яра» (Казан)
III урын – Мәүлетова Руфинә Илдар кызы – халык авыз иҗаты «Таш алыплар» турында риваять (Саба районы, Туктар авылы)

18 яшь һәм өлкәнрәк катнашучылар арасында
«Шигърият»:
I урын – Гәрәев Салават Булат улы – Ә.Атнабаев - «Без малайлар идек» (Биектау районы, Ямаширмә авылы)
II урын – Галиуллина Зөлфия Хәбибулла кызы – Ә.Атнабаев «Вакыт юк» (Норлат)
III урын – Якупов Айрат Айдар улы – М.Акмулла «Синең биш асылың» (Теләче районы, Теләче авылы)
III урын – Гарипов Ленар Илгиз улы – Э.Әхмәтова «Мин кайтырмын» (Владимир өлкәсе, Муром шәһәре)

«Проза»:
I урын – Сафина Элина Виталий кызы – Ә.Еники «Гөләндәм туташ хатирәсе» романыннан өзек (Казан)
II урын – Ильязова Зилә Рәис кызы – Ә.Еники «Матурлык» (Балтач)

Иҗади гаиләләр арасында
I урын – Нуруллиннар гаиләсе – Г.Тукай «Таян Аллага», И.Нуруллина. «Гаилә» (Яшел Үзән)
II урын – Нуруллиннар гаиләсе – Ф.Сафин «Туган телдә сөйләш, балам», Л.Лерон «Татар баласы» (Түбән Кама)
III урын – Мәрдәновлар гаиләсе – М.Җәлил «Эш дуслары» (Балтач районы, Кариле авылы)
«Туган батыр» халыкара бренденнан махсус бүләк – Закировлар гаиләсе – Ә.Закиров «Шәби дәфтәре» (Бөгелмә)
«Туган батыр» халыкара бренденнан махсус бүләк – Гыймадиевлар гаиләсе – Ш.Җиһангирова «Әнием дәресләре», Р.Миңнуллин «Әнкәйләргә Аллаһ ярдәм бирсен!» (Байлар Сабасы)

Профессионаллар арасында
I урын – Җиһаншин Фәнис Рәдиф улы – Р.Вәлиев «Музейда янгын» (Казан)
II урын – Майдуллин Фаиз Фоат улы – И.Сәләхов «Ана тавышы» хикәясеннән өзек (Чаллы)
III урын – Сибгатуллин Фикрәт Рафик улы – Ф.Яруллин «Ул җырны мин генә беләм...» (Зәй районы, Югары Налим авылы)

15 яшь һәм аннан өлкәнрәкләр арасында үзем язган шигырь номинациясендә
I урын – Гыйбадуллина Лилия Фаис кызы - «Гомерем ике түгел» шигыре (Чаллы)
II урын – Гыйләҗев Фәнил Фаил улы - «Кече Ватаным» (Казан)
III урын – Дәүләтшин Линар Абдулла улы - «Бирешмибез картлыкка» (Кама Тамагы районы, Даныш авылы)
Татарстан Республикасы Язучылар берлегеннән махсус бүләк - Садреева Диана Илшат кызы - «Бирешмибез картлыкка»

«Туган тел» махсус номинациясендә
I урын – Алексеев Антон Алексеевич - М.Шкетан «Мичун уке ачажат» ойлымаш гыч ужаш (Марий Эл республикасы, Морки районы)
I урын – Иванова Екатерина Денисовна - «Я-женщина удмуртка» (Балтач районы, Югары Ушма авылы)
I урын – Мишакина Мария Артемовна - «Эрзянь мастор», авторы билгесез (Лениногорск)
I урын – Андреева Анастасия Валерьевна - «Янра чаваш юрри» (Буа районы)

Зөлфия Шәвәлиева

"Татар-информ"