«Тәртип» радиосы «Татар никахы» дип аталган яңа проект башлады

«Хәзер туйлар түгел, ә никах туйларын үткәрү модага керде. Бу бик яхшы күренеш, ләкин кеше югалып кала, чөнки сораулар күп, ә тулы мәгълүмат алырлык чыганак юк. Шуңа безгә бик күп сораулар килә. Фольклорчылар, дин әһелләре әзерләгән китапларда мәгълүмат табарга була, ләкин кеше җиңел әйбергә күнеккән. Проектның максаты – алтын урталыкны табып, бер кулланма, әсбап булдыру. Дин әһеле, фольклорчы, мәҗлесне алып баручылар үз сүзләрен әйтергә тиеш. Без, барлык якны тыңлап, никах мәҗлесен үткәрү буенча ярдәмлек булдырырбыз дип ышанам», – дип сөйләде радионың баш мөхәррире Ризәлә Исмәгыйлева. 

Проект кысаларында бүген беренче түгәрәк өстәл узды.Түгәрәк өстәлдә күтәрелгән төп сорау – татар никахы башка халыкларныкыннан нәрсәсе белән аерыла һәм ул нинди булырга тиеш?

«Бу әле безнең беренче түгәрәк өстәл, бу – зур проектның башы. Бик зур өмет белән башлыйбыз, нәтиҗәсен күрербез, дип ышанам. Татар никахын үткәрү буенча төп әсбап булырга тиеш. Анда, төбәкләргә бәйле рәвештә, һәр якның үз йоласы өстәлер, ә без төп умыртка баганасын ясап куярга тиеш», - дип сөйләде ул.

Түгәрәк өстәлдә Татарстан Диния нәзарәтенең баш казые Җәлил хәзрәт Фазлыев, Россия Мөселман хатын-кызлар берлеге рәисе Наилә Җиһаншина, Татарстанның атказанган сәнгать эшлеклесе, фольклорчы, филология фәннәре кандидаты Фәнзилә Җәүһәрова, «Ак калфак» татар хатын-кызлары иҗтимагый оешмасы җитәкчесе Кадрия Идрисова, «Риваять» этнотөркеме җитәкчесе Руслан Габитов, дини мәҗлесләр алып баручы Марсель Әхмәдуллин һәм Ильяс Халиков катнашты.

Гөлүзә Ибраһимова

"Татар-информ"