Самара татар-мишәрләренең биюләрен өйрәнү буенча мастер-класс Кабан яр буенда үткәреләчәк

Кабан күле буенда 3 нче августта «Хәрәкәттә – бәрәкәт» проектының чираттагы дәресе узачак. Бу юлы Казан халкын һәм кунакларын Самара татар-мишәрләре биюенә өйрәтәчәкләр.

Кичә «Вакка басу» перформансы белән башланачак. Бу Самара өлкәсендә яшәүче татарларның бию үзенчәлекләренең берсе. Тамашаның музыкаль өлешендә татар традицион көйләре белән беррәттән Самара татарларының фольклорыннан – «Ярмәк вагы», «Камышлы вагы» көйләре яңгыраячак. 

Перформанста һәм мастер-класста профессиональ биючеләр – «Нардуган» җыр һәм бию ансамбле солисты Фәнис Хәйруллин, Татарстан Дәүләт җыр һәм бию ансамбленең балет артисты Руслан Хәбибуллин, «Казан» бию ансамбленең экс-солисткасы, Казан шәһәренең Идел буе районы балалар сәнгать мәктәбенең педагог-хореографы, «Алтын» студиясенең хореография мәктәбе педагог-репетиторы Лилия Хәмидуллина катнашачак. 

Җанлы музыкаль бизәлеш өчен оста инструменталистлар командасы җавап бирә: тальян, гармун, курайда педагог Ильяс Фархуллин, баянда «Бәрмәнчек» фольклор ансамбле оркестрының музыканты Рөстәм Рафигуллин уйнаячак. Башлану вакыты 18:00 сәгатьтә, керү ирекле, дип хәбәр иттеләр Башкарма комитетның тел культурасы өлкәсендә милли сәясәтне гамәлгә ашыру бүлегендә. 

«Хәрәкәттә – бәрәкәт» проекты Казан Мэриясе тарафыннан Татарстан Республикасы Рәисе каршындагы татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән шәһәрнең Парклар һәм скверлар дирекциясе белән берлектә тормышка ашырыла.

KZN.RU