Минтимер Шәймиев: Россиянең барлык халыкларының мәдәниятен саклап калырга кирәк

Татарстан Дәүләт Киңәшчесе Минтимер Шәймиев бүген Лаеш районының Боровое Матюшино бистәсендәге сайлау участогында Конституциягә төзәтмәләр кертү буенча тавыш бирүдә катнашты. Ул Россиянең барлык халыкларының мәдәниятен саклап калырга һәм берләштерүче параметрларга чыгарга кирәк дип саный. Бу хакта Татарстан Дәүләт Киңәшчесе матбугат хезмәте хәбәр итә.

2020 ел тарихи вакыйгаларга бай, барыннан да элек — ул Татарстанның 100 еллыгы. Бәйрәм дәвам итә, без үз тарихыбызны яктыртуны дәвам итәбез, ди ул.

«Россия Федерациясенең барлык халыкларындагы кебек үк, халкыбызның гади булмаган тарихында да гасырлык юлны илдә һәм Татарстан территориясендә яшәүче барлык халыклар белән килешеп уздык. Сынаулар катлаулы булды, әмма без аларны намус белән узабыз. Онытырга хакыбыз юк: бердәмлек аша гына без бу катлаулы юлны узабыз», — диде Шәймиев.

«Бүгенге тавыш бирү Россиянең гамәлдәге Конституциясенең аерым маддәләренең үзгәрүенә бәйле. Татарстан һәм Россия Конституциясен кабул итүнең тарихи вакыйгаларында катнашучы буларак, шуны әйтәсем килә: ул вакытта без илнең гамәлдәге Конституциясенең төп маддәләрен билгели алдык, алар берләштерүче ролен уйнады һәм дәвам итә. Әмма алда эшләр аз түгел», — дип сөйләде Татарстан Дәүләт Киңәшчесе.

Ул һәрвакыт күпмилләтле Россиядә татулык һәм үзара аңлашу турында сөйләвен искәртте. «Алга таба да без моны сакларга һәм бу юлдан баруыбызны дәвам итәргә тиеш. Бигрәк тә мәдәният өлкәсендә бурычларны гамәлгә ашыру, барлык халыкларның гореф-гадәтләрен һәм телләрен саклау мәсьәләләре турында Россия Президенты Владимир Владимирович Путин һәм безнең президент Рөстәм Нургалиевич Миңнеханов күп тапкырлар әйтте», — ди Шәймиев.

«Россиянең барлык халыкларының мәдәниятен саклап калырга һәм берләштерүче параметрларга чыгарга кирәк. Бу катлаулы юл, әмма без тәҗрибә тупладык. Моның белән тагын да көчлерәк шөгыльләнергә кирәк, безнең көчебез — шунда», — дип йомгаклады Минтимер Шәймиев.

«Татар-информ»