Күргәзмәләр, «Касә»дә фотосессия, гаилә фестивале – Казанда Гаилә, мәхәббәт һәм тугрылык көнен ничек билгеләп үтәчәкләр?

Бу шимбәдә Казанда Гаилә, мәхәббәт һәм тугрылык көненә багышланган чаралар узачак. Татарстан башкаласында Россиянең мөһим гаилә бәйрәме ничек узачак – KZN.RU порталы материалында.

Традицион тәре йөреше һәм бәйрәм гыйбадәте 

Казанда бәйрәм чаралары 7 нче июльдә барлык гыйбадәтханәләрдә традицион кичке гыйбадәт кылудан, Кирилл чиркәвендәге тәре йөреше һәм бәйрәм гыйбадәтеннән башланачак, аннан соң 2018 елда ачылган Архиерей ишегалды диварлары янында кенәз Петр һәм княгиня Феврония һәйкәленә чәчәкләр салу тантанасы планлаштырыла. 

Кенәз Петр һәм княгиня Феврония Рус православие чиркәвендә никахның яклаучылары булып санала. Гаилә, мәхәббәт һәм тугрылык көне беренче тапкыр Россиядә Гаилә елы дип игълан ителгән 2008 елда билгеләп үтелә.

«Әкият» курчак театры каршында «Казан – бәхетле гаиләләр шәһәре» шәһәр фестивале 

Оештыручылар төрле кызыксынулар буенча мәйданчыклар, гаиләләр өчен аттракционнар белән күңел ачу аллеясы, лекторийлар, психологлар белән очрашулар һәм фотокүргәзмә планлаштыралар. Өстәвенә, биредә төрле яшь төркемнәре өчен уен зоналары ачылачак, төрле шоулар, мастер-класслар, спорт ярышлары узачак, шулай ук иҗат коллективлары чыгыш ясаячак. 

Фестивальнең төп вакыйгасы «Мәхәббәт һәм тугрылык өчен» медале белән бүләкләү тантанасы булачак. Быел аңа 11 гаилә пары лаек булды. Бүләк үзара мәхәббәт һәм тугрылыкка нигезләнгән гаилә нигезләрен ныгыткан өчен, шулай ук уртак хезмәт, балалар тәрбияләү белән тәэмин ителгән иминлеккә ирешкән өчен бирелә. 

Бүләкләнүчеләр исемлегендә Бөек Ватан сугышында катнашучы Рожков Николай Максимович һәм аның хатыны тыл хезмәтчәне Антонина Ивановнаның гаиләсе, алар ике ул, дүрт онык һәм сигез оныкчык тәрбияләгәннәр, Татарстанның физика-химия фәнни берләшмәсенең атказанган вәкилләре Ольга Стефановна һәм Юрий Федорович Зуевлар гаиләсе, Муса Җәлил исемендәге премия лауретлары Сүрия Габделхак кызы һәм Наил Мәсгут улы Бариевлар гаиләсе һәм башкалар бар. 

Әлеге медаль белән бүләкләнгән гаилә парларының фотолары Казанның барлык районнарында цифрлы билбордларда урнаштырылачак. 

Бу бәйрәм көнендә Казанның Гражданлык хәле актларын теркәү бүлекләрендә никахлашу тантаналары узачак – бер меңгә якын пар законлы рәвештә ир белән хатын булачак. Ел башыннан бирле 3 795 Казан пары үз мөнәсәбәтләрен никах бәйләнешләре белән ныгыткан, ә 8 461 гаиләдә балалар туган. Узган атнада гына да Татарстан башкаласында 352 бала туган: 199 малай һәм 153 кыз. 

Котлау концертлары, күргәзмәләр һәм конкурслар, күп балалы гаиләләрне хөрмәтләү 

Александр Пушкин исемендәге мәдәни үзәк танылган Татарстан рәссамы Михаил Нефедовның шәхси күргәзмәсен ачачак. Экспозициядә гаилә, мәхәббәт һәм тугрылык темасына картиналар, шулай ук фәлсәфи эшләр тәкъдим ителәчәк. 

Васильченко исемендәге скверда Киров һәм Мәскәү районнары администрациясе белән берлектә 50 һәм 60 ел бәхетле никахта яшәгән юбилярларны хөрмәтләү тантанасы планлаштырылган. 

Идел буе Гражданлык хәле актларын теркәү бүлегендә барлык парларга никахларын теркәү тантанасы вакытында «Дөньяда иң мөһиме – гаилә һәм мәхәббәт» акциясендә катнашырга тәкъдим ителәчәк. Махсус әзерләнгән стендта яшь пар үз кулларының эзләрен калдырачак, алар гаилә, мәхәббәт һәм тугрылыкны символлаштырган ассоциацияләрен язачак. 

«Казан» гаилә үзәгендә барлык теләүчеләр бәйрәмгә махсус әзерләнгән фотозонада фотосессиядә катнаша алачак, ә Киров районының Гражданлык хәле актларын теркәү бүлегендә яшь парларга бәйрәмнең символы – ромашка бүләк ителәчәк, чөнки бу кыр чәчәге элек-электән Русьта мәхәббәт символы булып саналган. 

«Миңа тормыш бүләк ит!» акциясен үткәрү планлаштырыла. Аның максаты – Россиядә абортлар санын киметү, шулай ук гаилә кыйммәтләренең мөһимлеге турында сөйләү.

KZN.RU