Казанның 60 тан артык белем бирү учреждениесе «Дуслык тәпие» конкурсында катнашты

«Дуслык тәпие» конкурсында Казанның 66 белем бирү оешмасы катнашты. Алардан биш: «Кеше эткә дус», «Айболит һәм башкалар», «Инклюзив белем бирүдә зоотерапия», «Зооволонтер» һәм «Тәпиеңне бир, дустым» номинацияләре буенча 75 гариза керде.

Катнашучылар хуҗасыз хайваннарга карата сак мөнәсәбәттә булу һәм аларга ярдәм күрсәтү темасына проектлар тәкъдим иттеләр. Җиңүчеләр үз идеяләрен гамәлгә ашыруга 50 мең, 100 мең һәм 200 мең сум күләмендә грантлар отты.

«Кеше эткә дус» номинациясендә беренче урынга «Сәяхәт» өстәмә белем бирү үзәге ия булды. Икенче урынны – 33 нче гимназия һәм 328 нче балалар бакчасы, өченче урынны 82 нче һәм 286 нчы балалар бакчалары бүлеште.

«Айболит һәм башкалар» юнәлешендә беренче урынга 80 нче балалар бакчасы лаек дип табылды. Икенче урынны жюри әгъзалары 226 нчы балалар бакчасына һәм «Заречье» өстәмә белем бирү үзәгенә бирде. Өченче урында – 134 нче һәм 291 нче балалар бакчалары.

122 нче балалар бакчасы «Инклюзив белем бирүдә зоотерапия» номинациясендә җиңүче булды. Икенче баскычта – 207 нче һәм 2 нче балалар бакчалары, ә өченчедә 101 нче балалар бакчасы һәм 130 нчы мәктәп урнашты.

«Зооволонтер» номинациясендә беренче урынны 81 нче мәктәпкә бирделәр. Икенче позицияне – Шәһәр балалар экология-биология үзәге һәм 70 нче мәктәп, өченче урынны 10 нчы балалар сәнгать мәктәбе һәм 69 нчы мәктәп бүлеште.

«Тәпиеңне бир, дустым» юнәлешендә җиңүчеләрне «Фотография» һәм «Видеороликлар» ярдәмче номинацияләрендә билгеләделәр. Беренчесендә «Сәяхәт» өстәмә белем бирү үзәге җиңде, икенче урында 151 нче мәктәп урнашты. «Видеороликлар»да иң яхшысы 181 нче мәктәп булды, икенче урында – 187 нче лицей, дип хәбәр итә Казан мәгариф идарәсе.

Исегезгә төшерәбез, узган ел конкурс комиссиясе Казанның 91 белем бирү учреждениесе проектларын сайлап алды. Җиңүчеләргә шулай ук 50 мең сумнан 200 мең сумга кадәр грантлар тапшырылды.

kzn.ru