Казанда Сөембикә манарасын һәм Алафузов театрын реставрацияләү проектларын әзерлиләр

Барлык объектларда эшләрнең гомуми бәясе 30 млн сумга якын тәшкил итә. Шушы сумманың 8 миллионы Сөембикә манарасын саклау проектын эшләүгә китәчәк. Белгечләргә объектның торышын бәяләргә, шул исәптән югалган өлешләрен билгеләргә, тарихи-архив мәгълүматларны һәм хәзерге тикшеренү материалларын исәпкә алып, реставрациянең эскиз проектын эшләргә, аны дәүләт экспертизасына әзерләргә һәм аны уңышлы үтәргә кирәк.

Моннан тыш, килешү нигезендә подрядчыга инженерлык эзләнүләре үткәрергә, ремонт-реставрация эшләрен башкару өчен җитәрлек проект документациясен әзерләргә һәм Казандагы объектларга экспертизаның уңай нәтиҗәсен алырга кирәк булачак. Аларга түбәндәге объектлар керә:

- Алафузов театры;

- 1922-1932 елларда композитор Солтан Габәши яшәгән йорт;

- 1934-1964 елларда галим-тел белгече, профессор Мөхәммәтхан Фазлуллин яшәгән бина;

- Пушкин урамындагы 1951 елда төзелгән 58 нче йорт;

- Җырчы һәм композитор Нияз Даутов яшәгән йорт (19561960);

- хатын-кызлар епархия училищесы, XIX гасыр.

Чистай районында эшләр XX гасыр башында төзелгән дини училище һәм хатын-кызлар гимназиясе биналарында җәелдереләчәк.

Эшләрнең заказчысы — Татарстан «Главстрой» оешмасы, финанслау чыганагы — республика бюджеты.

Эшләрне башкаручы килешүдә күрсәтелгән барлык эш этапларын 2024 елның 21 августына кадәр тәмамларга тиеш.

"Татар-информ"