Казан халкы өчен метро станцияләре янында гриппка каршы бушлай вакцинация оештырганнар

Казанның алты метро станциясе янында гриппка каршы вакцинация пунктлары эшли башлады. 18 яшьтән алып теләге булган һәркем прививка ясата ала. Вакцинация узу өчен, паспортны күрсәтергә кирәк.

Мобиль пунктлар «Авиатөзелеш», «Яшьлек», «Кәҗә бистәсе», «Тукай мәйданы», «Җиңү Проспекты» һәм «Имәнлек» метро станцияләре янында ачылган. Шәһәрлеләрне көн саен 8:00 дән 19:00 га кадәр көтәләр.

Табиблар халыкка «Совигрипп» вакцинасы белән прививка ясый, дип хәбәр иттеләр ТР ССМ Казан буенча Сәламәтлек саклау идарәсендә.

Вакцинация – грипптан саклануның иң нәтиҗәле ысулы. Җәй ахыры һәм көз башы – прививка ясату өчен иң уңайлы чор — иммунитет авырулар саны күтәрелгәнче формалашырга өлгерәчәк.

Ел саен грипп вируслары үзгәреп тора, яңа штаммнар барлыкка килә, ә алдан узган вакцинациядән иммунитет кими. Шуңа күрә ел саен прививка ясатырга кирәк.

kzn.ru