Казан циркы үзенең «игезәк» сайтлары аша билет алмаска киңәш итә
Казан циркы үзенең «игезәк» сайты барлыкка килүен хәбәр итә – анда билетлар чын, ләкин алар кыйммәтрәк тора.
«Мондый сайтлар зур мәдәният учреждениеләренең бәласы. «Игезәк» сайтның Казан циркы тамашаларына билет сату килешүе юк. Алар чын билетлар сата, әмма бәяләре 2-3 тапкыр кыйммәтрәк», дип хәбәр итә Казан циркы үз аккаунтларында.
Цирк җитәкчелеге әйтүенчә, аларның шикаяте мондый сайтларның вакытлыча ябылуына китерә, әмма алар тагын ачыла.
«Игезәк» сайтта 3 яшькәчә бала өлкән кеше белән түләүсез керә ала диелгән. Казан циркында өлкәннәр белән керүче 5 яшькәчә баланы аерым урынсыз гына бушка үткәрәләр.
Казан циркының рәсми сайты - https://kazan-circus.ru. Башка төрле сайтларга юлыксагыз, Казан циркы алардан билет алмаска киңәш итә. «Игезәк сайттан билет алган булсагыз, борчылмагыз, алар чын билетлар. Кыйммәтрәк кенә», диелгән Казан циркы хәбәрендә.
Рузилә Мөхәммәтова
Следите за самым важным и интересным в Telegram-каналеТатмедиа
Нет комментариев