Камал театрының яңа бинасына үткәреләчәк су белән тәэмин итү челтәрләре 81 млн сумга төшә
Камал театрының яңа бинасына су белән тәэмин итү һәм юынтык суларны агызу челтәрләре үткәрергә ниятлиләр. Эшләрнең бәясе 81 миллион сум тирәсе тәшкил итәчәк, диелә дәүләт сатып алулары порталында урнаштырылган тендерда.
Документлар нигезендә, эшләрнең заказчысы - «Водоканал» муниципаль унитар предприятиесе – эшләр килешү төзелгәннән соң ике ай эчендә башкарылыр һәм объект челтәрләргә тоташтырылыр дип көтә. Башкаручы алдында җир казу эшләре, сөзәк урыннарны ныгыту, камера урнаштыру, торба үткәргечләр сузу һ.б. эшләр башкару бурычы тора.
Төзелешне «Водоканал» муниципаль унитар предприятиесе финанслаячак.
Искәртеп узабыз, ел башында Татарстан Рәисе Рөстәм Миңнеханов театрның яңа бинасы төзелә торган урында булган иде.
«Татар-информ» агентлыгы элегрәк хәбәр иткәнчә, яңа бинаның мәйданы 49 мең квадрат метр тирәсе тәшкил итәчәк. Биредә берничә зал, креатив-белем бирү лабораторияләре, иҗтимагый зона, шулай ук репетицияләр үткәрү һәм административ бүлмәләр урнашыр дип көтелә.
Следите за самым важным и интересным в Telegram-каналеТатмедиа
Нет комментариев