Ипподром урамындагы яңа инклюзив үзәккә сәламәтлек үзенчәлекләре булган 100 дән артык бала йөри

Ипподром урамындагы «Тылсым» инклюзив үзәгенә сәламәтлек мөмкинлекләре чикләнгән 100 дән артык бала йөри. Алар өчен төркемләп өйрәтү дәресләре уздырыла, иртә үсеш мәктәбе һәм укыту-күнегүләр фатиры оештырылган. Әлеге киңлектә начар күрүче балалар беренче тапкыр башка балалар белән бергә фильмнар карый алачак – моның өчен тифлоаңлатмалы җиһазлар сатып алганнар.

Әлеге җайланманы «Беренчеләр хәрәкәте» гранты акчасына сатып алганнар. Аның ярдәмендә волонтер сукыр балага экранда чагылдырылган, әмма тавыш белән расланмаган бөтен нәрсәне тасвирлаячак. Волонтерлар — 73 нче һәм 82 нче мәктәп укучылары, 5 нче лицей укучылары. Алар үзәктә тәрбияләнүчеләргә дәресләрдә булышалар.

Инклюзив киңлектә балалар нейро-иҗат, йога, коррекция буенча төркемле дәресләргә йөри, алар 45 минут дәвам итә һәм атнага ике тапкыр үткәрелә. Мондый дәресләргә ата-аналары белән бергә алтыдан артык бала йөрми. Шулай ук тәрбияләнүчеләргә мастер-класслар, айкидо буенча күнегүләр, театр остаханәсендә дәресләр үткәрәләр.

Моның өчен үзәктә яраклаштырылган иҗат кабинеты, спорт залы, балаларның ирекле аралашуы өчен җиһазлар һәм уеннар булган зур бүлмә, шулай ук вак моторика һәм сизгерлекне үстерү җайланмалары җиһазландырылган. Ата-аналар үтенече буенча биредә ашау-эчү һәм бәйрәмнәр оештыру өчен инклюзив кафе барлыкка килде.

Үзәктә торакка охшаган укыту-күнегүләр фатиры да урнашкан. Ул керү бүлмәсен, кунак бүлмәсен, ашханәне, йокы һәм юыну бүлмәсен үз эченә ала. Биредә мөмкинлекләре чикләнгән балалар озатучылар күзәтүе астында гади көнкүреш күнекмәләрен үзләштерәләр: җыештыру, кер юу, тегү, аш пешерү һ.б. Бу балаларга киләчәктә мөстәкыйльрәк булырга мөмкинлек бирәчәк.

Хәзер укыту-күнегүләр фатирына 9—12 яшьлек 20 бала йөри. Аларның сменасы өч ай дәвам итәчәк – декабрь ахырына кадәр. Укыту программасы һәр тәрбияләнүче өчен эшләнгән. Смена башланыр алдыннан куратор ата-аналар һәм бала белән очраша, гамәлдәге күнекмәләрне һәм ия булырга кирәкле күнекмәләрне билгели.

Үзәктә барлыгы 12 белгеч эшли. Хәзер киңлек волонтерларга мохтаҗ. Сайтта гариза тутырып, аларга теләгән һәркем кушыла ала.

Инклюзив үзәк сентябрьдә ачылды. Ул Ипподробная урамындагы 18 нче йорт адресы буенча урнашкан. Якында гына җәмәгать транспорты тукталышлары бар, бу сәламәтлек мөмкинлекләре чикләнгән балалар өчен кирәк урынга уңайлы барып җитәргә мөмкинлек бирә.

Баланы үзәккә «Игелекле Казан» кайнар линиясе телефоны буенча язарга була: +7 (843)558-74-18. Шулай ук хәбәрләрне «Вконтакте» социаль челтәре төркемендә сылтама буенча кабул итәләр. «Тылсым» үзәге җитәкчесе Лиана Садыйкова үзенчәлекле балалар әниләре өчен аерым әңгәмә төркеме оештырды, анда дәресләр җәдвалын белеп була.

Исегезгә төшерәбез, Татарстанда беренче укыту-күнегүләр фатиры 2022 елның җәендә шәһәрнең Совет районында Зәкиев урамында ачылды. Икенчесе бу елның гыйнварында Минская урамында эшли башлады. Апрель аенда Киров районының Юдино бистәсендә өченче инклюзив киңлек ачылды, анда тәрбияләнүчеләр Тимер юлчылар мәдәният йортының «Луч» иҗади лабораториясе белән шөгыльләнә. Сәламәтлек мөмкинлекләре чикләнгән балалар өчен тагын бер үзәк августта ишекләрен ачты. Шул киңлектә күнегүләр фатиры, психолог кабинеты, блогерлык һәм спорт-тернәкләндерү үзәге урнашкан.

«Тылсым» инклюзив үзәге «Беренчеләр хәрәкәте» гранты һәм «Татнефть» хәйрия фонды акчаларына эшли, дип хәбәр иттеләр «Игелекле Казан» АКО.

kzn.ru