Илсур Метшин Дима Билан турында: «Безнең якташыбыз, Питрәч районыннан чыккан этник татар дисәк тә була»

«Безнең якташыбыз, Питрәч районыннан чыккан этник татар дисәк тә була» – шәһәр Мэры Илсур Метшин Дима Биланны «Игелекле Дулкын» фестиваленә багышланган матбугат конференциясендә шулай тәкъдим итте. Чара бүген Казан Ратушасында узды.

«Атказанган артист Дима Билан» кебек яңгырый. Ә кайчандыр барысы да «Халык дулкыны»ннан башланган иде. Һәм эш шунда ки, минем язмышым профессиональ һәм искиткеч команда Игорь Яковлевич Крутой компаниясе белән хезмәттәшлек иткәннән соң нык һәм кискен үзгәрде. Безнең барыбызга да шундый искиткеч кеше, профессионал, композитор янәшәсендә булу бәхете елмайды», – диде җырчы.

«Чакыруыгыз өчен зур рәхмәт. Мин әлеге хисләрне тагын бер тапкыр тоярга бик шатмын. Серләр һәм әкиятләр, мавыгулар һәм өмет өзелүләр белән тулы искиткеч тормыш алып баручы күп кешеләрнең язмышында катнашуыбызга нык сөенәм, музыка – ул сиңа юл ачучы искиткеч маяк. Бу ничек кенә абстракт яңгырамасын, музыка белән шөгыльләнгән һәр кешегә инде яхшы мәгънәдә яхшылык сеңеп өлгерә. Фестивальгә искиткеч матур киләчәк телим», – дип уртаклашты Дима Билан.

Журналистларның Татарстанда җырчының планнары турындагы сорауларына җавап биреп, артист үзенең Питрәч районындагы ата-бабалары йортында булырга теләвен әйтте.

«Мин аны сатып алырга бик теләгән вакыт та булган иде, ләкин мин ситуацияне ычкындырдым – анда яңа хуҗа. Хәзер сорау ачык. Гомумән, сез кан тартуның нәрсә икәнен аңлыйсыз. Яшь барган саен бу тагын да ныграк сизелә. Вакыйга ни белән бетүен соңрак җиткерермен», – дип йомгаклады җырчы.

Бүген кич «Пирамида» мәдәни-күңел ачу комплексында «Игелекле дулкын» фестиваленең гала-концерты була. Катнашу өчен бөтен Россиядән 1,5 меңнән артык кеше гариза биргән. Региональ сайлап алу турлары Казанда, Ярославльдә, Мәскәүдә, Краснодарда, Кемеровода, Екатеринбургта, Новосибирскида һәм Севастопольдә уңышлы узды. Финалга авыр тормыш хәленә эләккән гаиләләрдән 99 бала, шул исәптән Казанда яшәүче 13 бала үтте. Балаларга ярдәм итү өчен ТР башкаласына Дима Билан, Игорь Крутой, Лариса Долина һәм Сосо Павлиашвили килде.

«Игелекле дулкын» бөтенроссия балалар иҗаты мәдәни-хәйрия фестивале 2017 елда Татарстан башкаласы Мэры Илсур Метшин һәм Россиянең халык артисты, композитор Игорь Крутой инициативасы белән оештырылды. Фестиваль Мәдәни инициативалар Президент фонды, ТР Хөкүмәте һәм «Игелекле Казан» ярдәме белән үткәрелә. Оештыручылар булып ТР башкаласы Мэриясе һәм Игорь Крутойның популяр музыка академиясе тора.

Диана Жиленкова, Юлия Летникова

KZN.RU