Балаларны беренче сыйныфларга кабул итү кампаниясе башланды

Татарстан башкаласында балаларны беренче сыйныфларга кабул итү кампаниясе башланды. Киләсе уку елында беренче тапкыр мәктәп парталары артына 17 меңнән артык бала утырачак. Кайсы чорга кадәр гариза бирергә мөмкин булуы, нинди

документлар әзерләргә кирәклеге, мәктәпкә керү турында кайчан билгеле булуы турында – KZN.RU материалында.

Кабул итүгә гаризаны ничек бирергә?

Булачак беренче сыйныф укучыларының ата-аналары, гадәттәгечә, документларны дүрт ысул белән: Татарстан һәм Россия дәүләт хезмәтләре порталлары, «Россия почтасы» аша һәм белем бирү оешмасына шәхсән кереп тапшыра ала. Шул ук вакытта мәктәпләрнең электрон почталарына җибәрелгән гаризаларны кабул итмәячәкләр.

Гаризаны ничәсенә кадәр бирергә мөмкин?

Булачак беренче сыйныф укучыларының ата-аналарыннан (законлы вәкилләреннән) гаризалар ике этапта кабул ителәчәк. Беренчесе 30 июньгә кадәр дәвам итәчәк. Бу чорда мәктәпкә беркетелгән территориядә яшәүче, шулай ук чираттан тыш, беренче чиратта һәм өстенлекле хокукы булган балаларны кабул итүгә гариза бирергә мөмкин.

Балалары мәктәпкә беркетелгән территориядә яшәмәгән ата-аналардан гаризалар икенче этапта кабул ителә. Ул 6 июльдә башлана һәм мәгариф оешмаларында буш урыннар тулганчы дәвам итәчәк. Шул ук вакытта гаризалар 5 сентябрьдән дә соңга калмыйча кабул ителәчәк.

Кем беренче чиратта һәм кабул итүдә өстенлек хокукына ия?

Чираттан тыш хокук хәрби хезмәткәрләрнең һәм РФ Милли гвардиясе гаскәрләрендә хезмәт итүчеләрнең балаларына кагылачак. Гаилә мәктәпкә беркетелгән территориядә яшәргә тиеш. Шулай ук хәрби хезмәткәрләрнең, полиция һәм эчке эшләр органнары хезмәткәрләренең, махсус исемнәре булган һәм җинаять-үтәтү системасы учреждениеләрендә һәм органнарында, мәҗбүри үтәү органнарында, федераль янгынга каршы хезмәттә һәм таможняда хезмәт узучыларның балаларының да беренче чиратта кабул ителү хокукы бар.

Мәктәпкә беркетелгән территориядә яшәүче гаиләләр өстенлек хокукына ия. Моннан тыш, өстенлек әлеге учреждениедә инде абый-апалары белем алучы балаларга да кагыла. Шул ук вакытта аларның бер адрес буенча бергә яшәве мәҗбүри шарт булып тормый.

Ата-аналарга нинди документлар әзерләргә кирәк?

Гариза белән бергә ата-ана аның шәхесен раслаучы документны һәм баланың туу турындагы таныклыгының күчермәсен бирергә тиеш. Кабул итүнең беренче этабында шулай ук баланың теге яки бу микрорайонда яшәве турындагы документлар һәм аның чираттан тыш, беренче чиратта яисә өстенлекле хокукын раслаучы документлар кирәк булачак. Кирәкле документларның тулы исемлеге ТР дәүләт хезмәтләре порталында бастырылган.

Дәүләт хезмәтләре порталы аша бирелгән гариза шул ук тәртиптә карала. Гаризаны тутырганда ата-ана мәктәпкә керү өчен кирәкле документларның сканерланган күчермәләрен беркетергә тиеш.

Нинди сәбәп белән баланы мәктәпкә кабул итмәскә мөмкиннәр?

Мәктәпкә кабул итүдән анда буш урыннар булмау сәбәпле генә баш тартырга мөмкиннәр. Бу очракта ата-аналар тиешле хәбәрнамә ала. Баланы башка мәгариф учреждениесенә кабул итсеннәр өчен ата-аналарга яшәү урыны буенча район мәгариф бүлегенә мөрәҗәгать итәргә кирәк. Белгечләр өч көн эчендә баланы буш урыннары булган якындагы мәктәпкә билгеләргә тиеш.

Мәктәптә укый башлаганда бала 6 яшь һәм 6 айдан кечерәк булмаска, әмма 8 яшьтән өлкәнрәк булмаска тиеш. Әгәр бала күрсәтелгән яшьтән кечерәк яки өлкәнрәк булса, шәһәр комиссиясенә мөрәҗәгать итәргә мөмкин, ул баланың мәктәпкә әзерлеген билгеләргә ярдәм итәчәк.

Мәктәпкә кабул ителү турында кайчан билгеле булачак?

Беренче этап тәмамланганнан соң, кабул итү турында карар өч эш көне эчендә кабул ителә. Бу хакта белдерү дәүләт хезмәтләре порталындагы шәхси кабинетка, шулай ук гаризада күрсәтелгән почта яки электрон адреска киләчәк. Икенче этапта мондый боерык гариза килгәннән соң биш эш көне эчендә әзерләнә. Бала теркәлү урыны буенча булмаган мәктәпкә учреждениедә буш урыннар булганда гына кабул ителергә мөмкин.

Беренче сыйныфларга кабул итү буенча сораулар белән кая мөрәҗәгать итәргә мөмкин?

Казан мәгариф идарәсендә бердәм кайнар линия эшли: +7(843)223-23-80 (өст. 66206, 66208). Шулай ук район мәгариф бүлекләренә телефон аша мөрәҗәгать итәргә мөмкин:

Авиатөзелеш һәм Яңа Савин районнары: +7 (843)223-23-77(өст. 66353);

Вахитов һәм Идел буе районнары: +7(843)223-23-73 (өст. 66336);

Киров һәм Мәскәү районнары: +7(843)223-23-75 (өст. 66372);

Совет районы: +7(843)223-23-76 (өст. 66384).