Алабуга Спас ярминкәсенә әзерләнә башлады

«Арбаны — кыштан, чананы җәйдән әзерлә» — бу әйтем Алабуга дәүләт музей-ядкарьлегендә узган очрашуга туры килә.

Алабугада Татарстан Республикасында иң популяр чараларның берсе булган Бөтенроссия Спас ярминкәсен үткәрү буенча беренче оештыру киңәшмәсе үтте.

Киңәшмәдә Алабуга муниципаль районы башкарма комитеты җитәкчесе Эльмира Әхмәдиева катнашты, ул ярминкә үткәрү тәртибендә булачак үзгәрешләргә игътибар итте, чөнки Шишкин буалары яңартылганнан соң сәүдә урыннарының күп өлеше тарихи урамнарга күчереләчәк.

Алабуга дәүләт музей-ядкарьлеге генераль директоры Гөлзада Руденко Спас ярминкәсе кысаларында оештыру планлаштырылган вакыйгаларны игълан итте. Бу көннәрдә Алабугага командировкада булган Кече туристлык шәһәрләре ассоциациясе (КТША) директоры Константин Анучин, ярминкәдә катнашу өчен ассоциациягә кергән шәһәрләрдән осталарны һәм оешмаларны җәлеп итәргә тәкъдим итте.

Очрашу АМР башкарма комитетының инфраструктура үсеше бүлеге һәм сәүдә бүлеге башлыклары Евгений Николаев һәм Марина Галимова, шулай ук XVII Бөтенроссия Спас ярминкәсен шәһәр җитәкчелеге һәм музей-ядкарьлек белән берлектә үткәрәчәк берничә компания җитәкчеләре — «Экспо-Кама» һәм «БАРС» җәмгыятьләре катнашында узды. Җитәкчеләр азык-төлек сәүдәсе нокталары өчен электр энергиясе кертү, ярминкәдә катнашучылар һәм кунаклар өчен парковка урыннары булдыру, бәдрәфләрнең өзлексез эшләвен һәм чүп-чарны җыештыруны оештыру, күрсәткечләр кую, бәйрәм кунакларына транспорт хезмәте күрсәтү һәм ярминкәнең яңа сайтын булдыру турында фикер алыштылар.

"Алабуга нуры"