Рөстәм Миңнеханов Алексей Текслерга Чиләбе татарларына ярдәм иткән өчен рәхмәт әйтте

Бүген Татарстан Республикасы Президенты Рөстәм Миңнеханов Чиләбе өлкәсе татар җәмәгатьчелеге активы белән очрашты. Очрашуда Чиләбе өлкәсе губернаторы Алексей Текслер катнашты. Рөстәм Миңнеханов губернаторга татарларга ярдәме өчен рәхмәт белдерде. Бу турыда Татарстан Президентының матбугат хезмәте хәбәр итте.

«Без татар җәмәгатьчелегенең өлкә җитәкчелеге белән үзара аңлашуын күрәбез. Монда татарлар өчен бөтен кирәкле шартлар тудырылган», — диде ул.

Чиләбе өлкәсе — Россиянең иң күп санлы татар җәмәгатьчелекләренең берсе — 180 меңнән артык кеше яши торган төбәк. Хәзерге вакытта өлкәдә утызга якын милли-мәдәни берләшмә эшли, шуларның иң мөһиме — Чиләбе өлкәсе татарлары конгрессы. 1998 елдан башлап оешманы Лена Колесникова җитәкли. Татар конгрессы барлык зур татар милли-мәдәни чараларын, фестивальләрне, концертларны, конкурсларны оештыручы һәм инициаторы булып тора.

Татарстан Президенты Чиләбе татарларының телен, мәдәниятен һәм гореф-гадәтләрен саклап калуга һәм үстерүгә керткән зур өлешен билгеләп үтте. «Без гореф-гадәтләребезне, телебезне, аш-суыбызны саклап калырга һәм киләсе буынга тапшырырга тиеш. Һәм бу сезнең кебек кешеләр ярдәме белән мөмкин булачак. Без, үз чиратыбызда, сезгә бу эштә һәртөрле ярдәм күрсәтәчәкбез», — диде Рөстәм Миңнеханов.

Алексей Текслер сүзләренчә, Чиләбе татарлары актив иҗтимагый эшчәнлек алып бара. «Чиләбе өлкәсендә татар общинасы бик актив, бигрәк тә татарлар конгрессы. Барлык чараларны да бергә уздырабыз, алар һәрвакыт бик матур һәм күркәм. Без алга таба да өлкәбезнең барлык татар иҗтимагый берләшмәләренә ярдәм итәчәкбез», — дип өстәде губернатор.

Аннары Рөстәм Миңнеханов Чиләбе өлкәсе татар җәмәгатьчелеге вәкилләренә бүләкләр тапшырды. 

«Татар-информ»