Әсгать Сәфәров: "Актанышта шундый объект төзелү - зур бүләк"

Тантаналы чарада Татарстан Республикасы Президенты Аппараты җитәкчесе Әсгать Сәфәров, «Челтәр компания»се  ААҖ генераль директоры Илшат Фәрдиев, Актаныш муниципаль районы башлыгы Энгель Фәттахов, объект төзелешенә өлеш керткән предприятие, оешма җитәкчеләре һәм коллективлары катнашты.
 

Кыска вакыт эчендә сафка баскан әлеге корылма Татарстанның юбилей елында энергетикларга зур бүләк булды дияргә кирәк. Бу хакта Әсгать Сәфәров та ассызыклап үтте.  - Энергетика республиканың әйдәп баручы тармакларының берсе. Аңа зур игътибар бирелә. Ә Актанышта шушындый объект төзелү сезнең өчен зур бүләк,- диде ул.

Илшат Фәрдиев тә энергетикларга куйган хезмәтләре, туган җирләрен яратканнары өчен рәхмәтен җиткерде. Бинаны «Стройинвестинжиниринг» ҖЧҖ төзегән. Алар үз  эшләрендә заманча дизайнер хезмәтен кулланганнар, биредә тышкы яктан  гына түгел, ә эчке яктан да офис проектларына инновацион якын килү күренә.

— Заман һаман саен алга бара. Безнең эштә дә яңа җиһазлар, яңа технологияләр керә тора. Кулланыштагы бинабыз заман таләпләренә җавап бирми башлады. Шунлыктан, яңа бина төзергә кирәк дигән фикер туды. Аны узган елның ноябрь аенда төзи башлаган идек. Инде күрәсез, нинди матур бина төзелде. Алда әйткәнемчә, эшебезгә яңалыклар керә тора. Без хәзер төзексезлекләр булган вакытта башка линияләрдә электр энергиясен сүндермичә, 10 кВ та югары көчәнеш вакытында да җитешсезлекләрне төзәтәбез. 12 меңгә якын абонентка хезмәт күрсәтәбез. Аларга интеллектуаль хисап җиһазлары куябыз. Шуның ярдәмендә абонентларның электр күрсәткечләре турыдан-туры безнең челтәрдә күренеп торачак. Нәтиҗәдә, абонентларга хисап күрсәткечләрен ай саен безгә хәбәр итеп тору кирәк булмый. Әлеге бинабыз, яңа җиһазлар эшебезнең сыйфатын тагын да арттырыр дип ышанабыз, - ди Актаныш “Челтәр компаниясе” җитәкчесе Марат Шакиров.

Беренче катта Актаныш РЭСының «Кулланучылар белән эшләү пункты» җиһазландырылган. Ул елына 240-270 кешене технологик тоташтыру мәсьәләсе буенча һәм 230-250 җир кишәрлеген рәсмиләштерү һәм башка мәсьәләләр буенча мөрәҗәгатьләр кабул итәчәк. Яңа бинада тиешле хезмәт күрсәтү өчен барлык шартлар да тудырылган. База тирәсендә “Энергетик” исеме астында яңа парк та булдырылган.

Чарада Энгель Фәттахов шушы бинаны төзеткәне өчен Илшат Фәрдиевкә рәхмәтен белдерде. - Моннан 25 еллар элек районны электр белән тәэмин итүдә өзеклекләр еш булса, хәзер андый проблемалар юк. Бу авыл хуҗалыгы тармагында бик мөһим. Хезмәтегездә уңышлар сезгә, - диде ул. Чарада Түбән Кама электр челтәре зонасына кергән "Челтәр компания" ләренә 8 УАЗ машиналары бирелде. Алар энергетикларга хезмәтләрендә зур ярдәм булачак.

Рузиля Хәсәнова

"Актаныш Информ"