Мәдәни җомга

«Слэм» заманча шигърият фестивале продюсеры Регина Әхмәтова: «Без Казанда әдәби-шигъри тусовка булдырырга телибез»

Шимбә көнне узачак фестиваль кунакларын әдәби лекторий, китап җыентыгы, ачык микрофон һәм танылган шагыйрә Ах Астахова чыгышы көтә.

Бу шимбәдә, 14-нче август көнне, «Черек күл» паркында заманча «Сләм» хәзерге заман шигъриятенең яшьләр фестивале узачак. Программада – шигырьләр уку, әдәби лекторийләр, китап җыентыгы, балалар арасында шигырь укучылар конкурсы һәм башкалар. Кунаклар шигырьләр, музыка һәм биюләрне берләштерүче уникаль перформансларны күрәчәк, шулай ук ачык микрофон форматында үз әсәрләрен укый алачак. Танылган шагыйрә Ирина Ах Астахованың чыгышы бүгенге шигъриятне яратучылар өчен аерым бүләк булачак. Чара турында тулырак «Татар-информ» мәгълүмат агентлыгында узган матбугат конференциясендә «Слэм» заманча шигърият фестивале идеологы һәм продюсеры Регина Әхмәтова сөйләде.

Фестиваль 10:00 сәгатьтә башлана – бу вакыт мәйданчыкта әдәби маркет эшләячәк. Аннары заманча шигърият, әдәбият темаларына дискуссияләр белән балалар конкурсы, әдәби лекторийләр ачылачак. Ә кичен төп сәхнәдә шигъри перформанслар белән сезонлы шигъри слэмнарның иң яхшы авторлары чыгыш ясаячак. Инде яратып өлгергән шагыйрьләр берничә шигырьдән һәм аларның арт-озатуыннан торган үз программасын әзерләячәк: әйтик, шигырьләрне уку музыка һәм бию белән бергә үрелеп барачак.

Фестиваль кунаклары да үз иҗаты белән уртаклаша алачак – моның өчен ачык микрофон оештырылачак. Фестивальнең кульминациясе Россия шагыйрәсе Ах Астахованың чыгышы булачак, ул 20:00 сәгатькә планлаштырылган.

Казанда кыштан бирле үткәрелгән сезонлы шигъри слэмнар циклы хәзерге заман шигърияте фестивале белән тәмамланачак. Фестивальнең продюсеры Регина Әхмәтова аңлатканча, слэм – ул катнашучылар халык алдында үз әсәрләрен башкарган шигъри ярыш.

«Мондый төрдәге чараларның үз кагыйдәләре бар. Безнең очракта сезонлы слэмда чыгыш ясаучы 21 шагыйрьдән шорт-лист формалаша. Алар үз иҗатларын берничә турда тәкъдим итә, шигырьләрне музыка астына да, тынлыкта да укый, – дип сөйли Р.Әхмәтов. – Һәр турда җиңүчеләрне тамашачылар онлайн-тавыш бирү юлы белән сайлый, ул чыгыш ясаганнан соң 50 минут эчендә уза».

Сезонлы шигъри слэм җиңүчесе приз ала – аның өчен видеоарт төшерелә, шулай ук яшь шагыйрь теләсә нинди онлайн-мәйданчыкларда тәкъдим итәргә мөмкин булган аудиошигырь яздыра алачак.

«Слэмнарның максаты – җиңү түгел, ә үз иҗатыңны күрсәтү, үз тамашачыңны табу, – дип өсти Р.Әхмәтова, ул үзе шигырьләр тугыз яшьтән иҗат итә башлаган. – Элек мин үз шигырьләрем белән уртаклашырга мөмкинлек эзләдем. Хәзер без шундый платформа булдырдык, безгә һәр яңа чара саен күбрәк кеше кушыла».

Берничә тапкыр конкурс программасында җиңүче булып Казанның яшь шагыйре Васил Сәфәргалиев танылды. Ул Р.Әхмәтованы хуплады һәм мондый чаралар уздыруның иҗатта алга таба да үсү өчен этәргеч булуын билгеләп үтте. «Беренче тапкыр чыгыш ясагач, мин шуны аңладым, бу миңа гына кызыклы түгел, фикердәшләремне таптым, халык тарафыннан җавап очраттым. Бу мине алга таба хәрәкәт итәргә этәргеч булды, – дип сөйли В.Сәфәргалиев. – Яшь шагыйрьләр шигъриятенең зур тамашачылары табылу, аларның шигърият белән кызыксынуы бик шәп. Алар моның болай гына эшләмәүләрен күрә».

Шигъри слэмнарда Казан халкы гына түгел, башка шәһәрләр дә катнаша – мәсәлән, Самара, Ульяновск, Воронеж, Пермь шагыйрьләре үз шигырьләрен укыды инде.

Шимбә фестивалендә инде конкурс түгел, ә килүчеләр өчен күңел ачу программасы уздырачаклар. «Фестиваль – без сезон эчендә башкарган эшләрнең төп арадаш ноктасы, – дип аңлата Р.Әхмәтова. – Кешеләр шигъриятнең заманча, модалы, кызыклы булырга мөмкин булуын аңласын өчен без әдәби-шигъри тусовка булдырырга телибез. Шигъри кичә кешеләрдә күңелсез, бертөрле, искергән нәрсә буларак ассоциацияләнә. Безнең максат – мондый кабул итүне үзгәртү».

Чарага керү ирекле, рәсми сайтта алдан теркәү буенча, анда шулай ук фестивальнең тагын да тулырак программасы белән танышырга мөмкин.

 

kzn.ru

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: