Казанда «Китап көне» фестивале: яраткан әсәрләр турында фикер алышу һәм ачык микрофонда катнашу

23 нче һәм 24 нче сентябрьдә Казанда А.С.Пушкин исемендәге мәдәни үзәктә «Китап көне» фестивале узачак. Катнашучылар өчен әдәби һәм иҗади кичәләр, дискуссияләр һәм ачык микрофон оештырылачак. Чараның хедлайнеры шагыйрь, очеркчы һәм редактор Эдуард Учаров булачак.

23 нче сентябрьдә «Казан кунак бүлмәсе» дигән әдәби кичә узачак, анда Эдуард Учаров республика башкаласының шигърият тарихында онытылган әдәби исемнәр, шул исәптән Гавриил Каменев (Казан шагыйре, прозаик һәм тәрҗемәче) турында сөйләячәк. Кичәдә чакырылган язучы шулай ук «Каменев үләргә бара» дигән яңа проза китабын тәкъдим итәчәк. Чара 14:00 сәгатьтә башлана. 

Әдәби кичәдән соң, 14:50 сәгатьтә, ачык микрофон оештырылачак, анда теләгән һәркем үзенең яраткан шигъри әсәрләрен сөйли алачак. 

24 нче сентябрьдә фестиваль «Китап клубы» дискуссия очрашуыннан башланачак, аның кысаларында килүчеләр яраткан әдәби әсәрләрен тәкъдим итә, бөтен катнашучыларга таныш китапларның проблемалары һәм темалары буенча фикер алыша алачак. Дискуссия 11:00 сәгатьтә башлана. 

12:50 сәгатьтә «Шигърият музыкасы» дигән иҗади кичә башланачак. Фестивальдә катнашучылар Россия язучылары шигырьләренә язылган музыкаль әсәрләрне тыңлаячаклар. 

Фестивальгә алдан теркәлү буенча керү ирекле, дип хәбәр итә оештыручылар. 

«Китап көне» фестивале Татарстан Республикасы Министрлар Кабинеты каршындагы Мәдәният һәм диалог яшьләр үзәге, Татарстан Республикасы Рус милли-мәдәни берләшмәсе, А.С.Пушкин исемендәге мәдәният үзәге һәм ТР Хезмәт, халыкны эш белән тәэмин итү һәм социаль яклау министрлыгы ярдәме белән «Укыйбызмы?» проекты кысаларында уза.

kzn.ru