Мәдәни җомга

Казан шәһәре

Республикада

Илсур Метшин Мәүлетов урамындагы «Сандугач» китапханәсенең ачылышка әзерлеген тикшерде

Бу – шәһәрдә концерт залы булган беренче китапханә булачак.

Җомга көнне Казанның Идел буе районында Мәүлетов урамында капиталь ремонттан соң 13 нче номерлы китапханә ачылачак. Ул, Клара Цеткин урамындагы китапханәдән соң, шәһәрдә яңа стандарт буенча модернизацияләнгән икенче китапханә булачак: төп киңлектән тыш, иҗади очрашулар өчен зоналар, укыту дәресләре һәм мөстәкыйль иҗади эшләр өчен зал, шагыйрә һәм драматург Гөлшат Зәйнәшеваның иҗади мирасына багышланган күргәзмә залы, шулай ук алмаш экспозицияләр каралган. Моннан тыш, бу – шәһәрдә концерт залы һәм китапларны кире кайтару станциясе булган беренче муниципаль китапханә.

 

«Сандугач» дип аталган китапханәне ачар алдыннан Казан Мэры Илсур Метшин бинаның әзерлеген тикшерде. Узган ел аның карары буенча китапханәләрнең китап фондларын тулыландыруга шәһәр бюджетыннан бүлеп бирелгән акчалар суммасы 2,5 тапкырга – 5 миллионнан 12 млн сумга кадәр арткан. Бу басмаларның ассортиментын шактый киңәйтергә һәм 12,6 мең яңа китап – классик әдәбиятны да, заманча авторларның әсәрләрен дә сатып алырга мөмкинлек биргән. Моннан тыш, шәһәр башлыгы йөкләмәсе буенча 13 нче номерлы китапханәнең эчке киңлеге яңадан эшләнгән, шәһәрлеләр өчен тагы да уңайланган.

 

Уку заллары һәм коворкингтан концерт киңлегенә кадәр

Мәүлетов урамында 1989 елда төзелгән китапханә шәһәрдә кеше күп йөри торган китапханәләрнең берсе булып тора – ремонтка кадәр аның китап фондыннан ел саен 5 меңгә якын укучы файдаланган. Ул халык күп яши торган микрорайонда урнашкан, ерак түгел медицина көллияте, спорт комплекслары, студентлар тулай торагы һәм башка социаль объектлар бар.

«Бүген китапханәләр иҗади киңлек булырга тиеш, биредә китап сөючеләр белән тематик очрашулар уздырыла, әсәрләрнең авторлары белән аралашулар оештырыла алыр иде. Берничә ел элек, Клара Цеткин урамында китапханә ачканда, казанлылар китапханәләр төзү һәм реконструкцияләүгә шушындый яктан якын килүне хуплады», - дип билгеләде Мэр. «Гаджетлар һәм компьютерлар булуга карамастан, укучылар саны көннән-көн арта бара, һәм без моның өчен сөенәбез. Хәзер китапханәләргә өлкән буын гына түгел, яшьләр дә кайта. Узган ел Казанда укучылар саны 200 меңгә арткан. Бу безнең дөрес юнәлештә эшләвебез турында сөйли», - диде И.Метшин.

 

 

Мәүлетов урамындагы китапханәне реконструкцияләү 2021 елның августыннан алып барыла. Проектның авторлары – Клара Цеткин урамындагы 26 нчы номерлы китапханәне модернизацияләүдә катнашкан «КРК Групп» ҖЧҖ һәм «Архитектура десанты» бюросы.

Мәүлетов урамындагы китапханәне капиталь ремонтлау вакытында эшчеләр фасадны реставрацияләделәр, түбәне, тәрәзәләрне, коммуникацияләрне яңарттылар, эчке биналарны бизәү эшләрен башкардылар, ишекләр, янгын сигнализациясе һәм видеокүзәтү системасы урнаштырдылар.

Китапханә киңлеге берничә зонага бүленгән. Уку залларында ачык киштәләрдә килүчеләр төрле темаларга китаплар таба алачак, биредә үк шәхси һәм төркем эше, ял итү өчен коворкинг урыннар да оештырылган. Китапханәнең төп залында зур чаралар һәм очрашулар оештыру, аудитория-остаханәдә презентацияләр, мастер-класслар һәм укыту дәресләре, дәресләр, шәхси консультацияләр, иҗади проектлар турында фикер алышу планлаштырыла. Моннан тыш, муниципаль китапханәдә беренче тапкыр зур булмаган концерт залы ясалды, анда әдәби-музыкаль кичәләр, лекцияләр, дискуссияләр һәм башка чаралар үткәреләчәк. «Бу китапханәгә яңа аудиторияне җәлеп итү өчен мөһим ресурс», - дип билгеләп үтте Казанның үзәкләштерелгән китапханәләр системасы директоры Резедә Исмәгыйлева.

Казан Мэры китапханәнең яңартылган бүлмәләрен һәм күргәзмә залын карады, биредә ул шагыйрә, драматург, публицист, Татарстан Республикасының атказанган сәнгать эшлеклесе, Г.Тукай исемендәге Дәүләт премиясе лауреаты Гөлшат Зәйнәшевага багышланган экспозиция белән танышты.

Сүз уңаеннан, китапханәнең исеме Гөлшат Зәйнәшеваның атаклы «Китмә, сандугач» җырына ишарә итә, ә үзенең фирма стиле мәдәни учреждениенең танылуына ярдәм итәчәк. «Үзенең уникаль исеме җирле җәмәгатьчелектә китапханәнең имиджын һәм танылуын арттыру өчен эшли торган ресурска әйләнә, аны башка учреждениеләр арасында аерып тора, территориянең мәдәни үсешенә ярдәм итә», – дип ассызыклады Казанның үзәкләштерелгән китапханәләр системасы директоры.

 

 

Шәһәр башлыгына шулай ук китапларны кире кайтару станциясенең эшен дә күрсәттеләр – укучылар үзләре укыган басманы, аны китап кабул итү җайланмасына салып, мөстәкыйль рәвештә тапшыра алалар. Резедә Исмәгыйлева сүзләренә караганда, киләчәктә китапханә янында махсус бокс урнаштыру планлаштырыла, аның ярдәмендә шәһәр халкы китапларны үзләре өчен уңайлы булган теләсә кайсы вакытта ала яки кире кайтара алачак.

Моннан тыш, 13 нче номерлы китапханәдә мөстәкыйль рәвештә китап бирү станциясен, фонд маркировкасын, объектларны һәм сак функцияләрен идентификацияләү өчен янгынга каршы системаны, шулай ук барлык RFID-җайланмалардан мәгълүматны берләштерүче, укучыларга бирелгән китаплар һәм китапларны кире кайтару турында статистика алу мөмкинлеге белән идарә итү өчен гомуми программа тәэмин ителешен үз эченә алучы система эшли.

«Мондый үзгәрешләрне без Мәүлетов урамындагы китапханәдә күрүебезгә шатбыз, аның янәшәсендә күп сандагы китап сөючеләр яши», – дип билгеләде Мэр. «Әлеге яңалыклар район халкының күңеленә хуш килер дип өметләнәм», - дип өстәде ул.

 

Яңартылган китапханә һәм төзекләндерелгән ишегаллары бердәм киңлеккә әйләнәчәк

Вахитов һәм Идел буе районнары администрациясе башлыгы Марат Закиров шәһәр Мэрына якын-тирә территорияне, шулай ук китапханә каршында булачак ял итү зонасын төзекләндерү проектын күрсәтте.

Китапханә ремонтыннан соң күршедәге 18 йортның (Хөсәен Мәүлетов ур., 17а, 17б, 19, 21, 23, 25, 27, 29, 31, 35, 37, 39, 41, Гарифьянов ур., 2, 4, 10, Сыртланова ур., 4, 10) ишегалларын төзекләндерү турында карар кабул ителде. Аларда 5 меңгә якын казанлы яши. Эшләр «Безнең ишегалды» республика программасы буенча алып барыла. 89 мең кв. м мәйданлы йорт яны территорияләрендә юл йөрү өлешенең асфальт катламын яңартачаклар, тротуарларны төзекләндерәчәкләр, ә парковка урыннары саны 155 кә артачак һәм 273 булачак.

Киләсе елда микрорайонда тагын 9 ишегалды төзекләндереләчәк. «Әлеге йорт яны территорияләрен капиталь төзекләндерүдән соң микрорайон тулысынча яңартылачак», – дип ассызыклады Марат Закиров.

«Без бинаның үзен реконструкцияләп кенә калмыйча, китапханә фондын да арттырдык, ел ахырына якындагы ишегалларны төзекләндереп бетерәчәкбез. Бу бердәм киңлек булачак», - диде Мэр.

13 нче номерлы китапханә бинасын яңарту һәм төрле чаралар үткәрү өчен яңа кластерлар ачу нәтиҗәсендә бирегә килүчеләр саны берничә тапкыр артыр дип көтелә, дип билгеләп үтте китапханә мөдире Рузинә Галимҗанова. Әйтик, Клара Цеткин урамындагы 26 нчы номерлы китапханәне капиталь ремонтлаганнан соң, 2020 елда килүчеләр саны 3 меңгә, ә бирелгән китаплар саны 7 мең данәгә арткан.

 

 

Исегезгә төшерәбез, Казанда Үзәк китапханә, Үзәк балалар китапханәсе һәм 47 китапханә-филиал эшли. Казан укучылары карамагында 2,5 млн китап һәм журналдан торган фонд бар. Узган ел шәһәр китапханәләренә 194 мең яңа китап укучы язылган. Китап һәм журнал 4,5 млн тапкыр бирелгән, бу узган ел белән чагыштырганда 200 меңгә күбрәк дигән сүз.

Узган ел шулай ук шәһәр китапханәләрен кирәкле җиһазлар белән тәэмин итү тәмамланды, алар арасында RFID-китапларны тану системасы да бар иде. «Китапка махсус тамга кертелә, ул аны тиз арада ачыкларга һәм китапханәдән алып чыгуны булдырмый калырга ярдәм итә. Моннан тыш, ремонтланган барлык китапханәләрдә дә урлау очракларына каршы махсус капкалар барлыкка килде», - дип ассызыклады Резедә Исмәгыйлева.

Мэр белән бергә китапханәне Мәдәният идарәсе башлыгы Азат Абзалов, Капиталь төзелеш һәм реконструкция идарәсе башлыгы Марат Сәмигулин һәм Тышкы төзекләндерү комитеты рәисе Игорь Сәлахетдинов карап чыктылар.

 

kzn.ru

Следите за самым важным и интересным в Telegram-каналеТатмедиа

Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев