Мәдәни җомга

Пензада “Кәлам Шәриф. Мәгънәви тәрҗемә”нең 2 мең басмасын таратуга татар меценатлары һәм активистлары кушылды

Пенза өлкәсендә яшәүче татарларга “Кәлам Шәриф. Мәгънәви тәрҗемә” басмасы таратыла башлады.

Әлеге китаплар ТР мөселманнары Диния нәзарәтеннән Пенза өлкәсенә махсус рейс белән 2 мең данәдә юлланган иде. Мәгънәви тәрҗемәләр беренче булып Пенза өлкәсенең татар Милли-мәдәни мохтарияте активистларына һәм мохтарият китапханәсенә тапшырылды. Коръәннең татар телендәге мәгънәви тәрҗемә басмасы белән Городищинский, Кузнецкий, Неверкинский, Шамышевский, Пенза, Каменский, Пачелмский, Белинский, Лопатинский районнарында һәм Пенза шәһәрендә яшәүче милләттәшләребезне, мәчет, мәктәп, китапханәләр, шулай ук җирле колонияләрне тәэмин итү ниятләнә.
Шунысын билгеләп үтәргә кирәк: гомуми авырлыгы 3,5 тонна булган китапларны Казаннан Пензага илтеп җиткерү һәм алга таба тарату эше татар меценатлары һәм җәмәгатьчелек ярдәме белән башкарыла. Бигрәк тә Рәшит Алюшев һәм Хәмзә Мамадалиев нык булышлык күрсәтә, алар милләттәшләребезгә Татарстан Республикасы мөфтие Камил хәзрәт Сәмигуллин исеменнән китаплар тапшыра.
Бүгенге көндә Пенза өлкәсендә 100 меңнән артык татар яши, 48 татар авылы бар. Күпчелек мәчетләр шушы авылларда урнашкан: алар 90 га якын мәхәллә исәпләнә.
ТР мөселманнары Диния нәзарәте Пенза өлкәсендәге милләттәшләребезгә китаплар таратуда ярдәм күрсәткән ватандашларыбызга рәхмәт белдерә.
“Кәлам Шәриф. Мәгънәви тәрҗемә” яңартылган басмасы 2020 елда Татарстан мөфтие, шәех Камил хәзрәт Сәмигуллин йөкләмәсе буенча, Россиянең татарлар күпләп яшәгән төбәкләрендә түләүсез тарату өчен, махсус тираж белән чыгарылган иде. Китап Камил хәзрәтнең милләттәшләргә туган телне һәм милли үзенчәлекләрне өйрәнү, саклау һәм үстерү кирәклеге турындагы мөрәҗәгатеннән башлана.

 

Дум РТ 

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: