Шоумен Рамил Шәрәфиев: Кеше телне сакларга гына түгел, ә популярлаштырырга тиештер

«Татар радиосы»ның баш мөхәррире, шоумен Рамил Шәрәфиев фикеренчә, кеше туган телене сакларга гына түгел, ә аны тагын да популярлаштырырга тиеш.

«Кеше үз телен сакларга гына түгел, популярлаштырырга да тиештер. Телебез бик матур бит. Безнең «һ», «ә» хәрефләре телебезне матурайта, йомшарта. Ничек шундый матур телдә сөйләшмисең инде? Башка илләр өчен чит тел бит инде ул. Башка илдә татарча сөйләшсәң, «Тагын бер тел белә», дип уйлап куялар. Ким дигәндә, шундый горурлык булсын иде кешедә», - диде ул «Гадел әңгәмә» тапшыруының яңа чыгарылышында.

Элегрәк «Татар-информ» Рамил Шәрәфиевның татар телен саклау күбесенчә дәүләт өстендә түгел, ә халык өстендә, дигән фикерен язган иде.

• «Гадел әңгәмә» тапшыруының яңа чыгарылышын сылтама аша кереп карый аласыз.

Гадел Әхмәтҗанов

"Татар-информ"