Мәскәүдә Ренат Ибраһимовны искә алдылар
Мәскәүнең Татар мәдәни үзәгендә күренекле татар җырчысы, композитор Ренат Ибраһимов истәлегенә багышланган кичә узды. Ул быелның маенда вафат булды. Артистның 75 яшьлеге уңаеннан җылы истәлекләр белән уртаклашырга туганнары, дуслары, хезмәттәшләре һәм бу талантлы кешене белүчеләр җыелды.
Татар милли-мәдәни автономиясе рәисе Фәрит Фәрисов сүзләренчә, чара баштан ук гаилә бәйрәме итеп уйланылган иде.
Мәскәүнең Милли сәясәт департаменты киңәшчесе Валерий Мищенко билгеләп үткәнчә, мәскәүлеләрнең төрле буыны Ренат Ибраһимовны һәм аның иҗатын хәтерли һәм ярата. Россия Мөфтиләр шурасы рәисенең беренче урынбасары, РФ мөселманнары Диния нәзарәте рәисе, Россия Мөфтиләр шурасы аппараты җитәкчесе Рушан Әббәсов сүзләренчә, Ибраһимов һәрвакыт Мәскәү һәм Мәскәү өлкәсенең мәдәни тормышында актив катнашты, төрле чараларга йөрде, аларда чыгыш ясады.
«Мин - Ренат Ибраһимовның фанаты. Ул - тембр короле, минем андый тавышны беркайчан да ишеткәнем булмады. Бу безнең горурлыгыбыз, мирасыбыз», - дип билгеләп үтте җырчының якын дусты, Россиянең һәм Татарстанның атказанган артисты Владимир Кудашев. Ул үз вакытында җырчының визит карточкасына әверелгән «Наш город» җырын башкарды.
Сәхнәдә шулай ук композитор, музыкант Миләүшә Хәйруллина, опера җырчысы, Зур театр солисты Марат Гали, җырчы, «Голос» һәм «Один в один» телевизион тамашаларында катнашучы Мари Карне, Россиянең атказанган артистлары һәм Ибраһимовның дуслары Сергей һәм Николай Радченко, ТРның атказанган артисткасы Роза Хәбибуллина, Россия композиторы, пианист Семён Сон, Россиянең атказанган артисты Феликс Царикати, Россиянең халык артисты Владимир Девятов, РФнең атказанган артисты Заур Тутов һәм башкалар чыгыш ясады. Татар һәм Россия поп-җырчысы Александр Айвазов шулай ук Ибраһимовның репертуарыннан «Любовь настала» җырын башкарды.
«Ул миңа 15 еллык җир оҗмахы бүләк итте. Татарстан Премьер-министры урынбасары - ТРның РФдәге Тулы вәкаләтле вәкиле Равил Әхмәтшинга, Мәскәүнең татар автономиясе рәисе Фәрит Фәрисовка һәм башка ярдәм итүчеләргә зур рәхмәт. Бу кичә бер айдан да азрак вакытта әзерләнде. Иремнең дусларыма, танышларга, иҗатын яратучыларга рәхмәт», - диде мәрхүм артистның хатыны Светлана Ибраһимова.
Фәрит Фәрисов мәрхүм артистның туганнарыннан Мәскәүнең Татар милли-мәдәни автономиясендә киләсе елны Ренат Ибраһимовка багышлау турындагы инициативаны хуплауларын сорады.
Следите за самым важным и интересным в Telegram-каналеТатмедиа
Нет комментариев