Айдар Җаббаров Түбән Кама театрында легендар башкорт әсәрен куя

«Без республиканың иң әйбәт режиссерларының берсе Айдар Җаббаровны чакырдык. Айдарның театрга килүе – бүләк. Мин аның безнең белән эшләргә теләгәненә бик сөенәм», – диде театрның баш режиссеры Лилия Әхмәтова «Татар-информ»да үткән матбугат конференциясендә.

«Бу әсәр белән Айдар башкачарак эшләячәк. 4-5 новелла була дип аңлыйм. Сугыш темасына мәхәббәт призмасы аша карау – темасы шулай билгеләнгән. Эш бара», - дип дәвам итте Лилия Әхмәтова.

«Сугыш һәм мәхәббәт темасына булачак. Әлегә беренче адымнар гына. Әле нәрсәдер әйтү кыенрак», – диде матбугат конференциясендә катнашучы Түбән Кама театры актрисасы Гүзәл Шәмәрданова.

• Таһир Таһиров псевдонимы белән башкорт язучысы, журналисты, җәмәгать эшлеклесе, Башкортстан обкомының идеология буенча секретаре булган Таһир Ахунҗанов иҗат иткән.
• Таһир Таһировның «Галия» повесте буенча Гафури театрында Рифкать Исрафилов тарафыннан шул исемдәге спектакль куелган. Әлеге спектакль төп рольләрдә Фидан Гафаров һәм Нурия Ирсаева уены белән тарихта калган. Композитор – Рим Хәсәнов, рәссам – Таң Еникеев. Гафури театрында премьерасы 1983 елда булган.

Рузилә Мөхәммәтова