Рифкать Имаев: «Кышкы шигырь»

Кыш турында икән шигырь,

Нидән башларга сүзне?

Озаттык кызганмый гына

Йөдәткән елак көзне.

Язып тормыйм кар турында,

Кабатлау булыр тагы.

Куяннарның: «Кыш килде!» – дип,

Ап-ак тун кигән чагы.

Ә җиһанның шундый мәле:

Тирә-як калган бушап.

Тик балан тирбәлә җилдә

Кан тамчысына охшап.

Кышка кердек. Курыккан юк

Бер дә эшсез калудан.

Авылларда көн башлана

Кулга көрәк алудан.

Ап-ак дөньяга сокланып

Туа ал таңнар гына.

...Ник агарып бетә алмый

Безнең бу җаннар гына?!.