Ләйсән Кәшфи: «Билгә кадәр сакал үстер...»

Билгә кадәр сакал үстер,

Түбәтәй ки, намаз укы.

Ураза тот, гыйбадәт кыл,

Калсын ашау, калсын йокы.

Корбан чалдыр, әүлиядан

Дога кылдыр нигезеңә.

Амин. Аллаһ кабул итсен,

Тик син кара үз-үзеңә.

Тик син кара көзгеләргә:

Ак сакалың, кара йөзең.

Ничек сине җир йотмаган?

Күр син: Раббың ничек түзем! 
Узган юлың кан-яшь тулы,

Корган ояң туздыргансың.

Явызлыкта, кансызлыкта

Фиргавенне уздыргансың.

Балаларның күз яшьләре

Кипмәгән бит яңагында.

Хәнҗәреңне кадагансың

Җаннарына яңа гына.

Хаҗга да бар, беләсең бит,

Кичерүче Раббым Аллаһ.

Тик шуны бел! Син рәнҗеткән –

Кичерергә тиеш алдан.