Флёра Гыйззәтуллина : «Егет күлгә кармак төшерә»

Балык тота халык боз өстендә...

Март кояшы балкый боз ашап.

Балкысаң да, үксеп еласаң да,

Узачак ул гомер, узачак.

Ястык кебек калын бозны тишеп,

Егет күлгә кармак төшерә.

Март аенда туган ир-егетнең

Алтын балык керә төшенә.

Күл өстендә бозлар тиз эреми:

Дулкын бозны төпкә кагачак.

Күлләреңне күккә күчерсәң дә,

Яначак ул йөрәк, яначак.

Балык тотып, егет илһам ала,

Мин дә шул ук күлдән су алам.

...Газиз халкым!

Бигрәк назлы инде

Март аенда туган бу балаң!

Балык тота халык...

Бу халыкны

Еллар әле уйга салачак.

Алтыннарга тиңләп яратсаң да,

Калачак бу дөнья, калачак...