Айрат Суфиянов: «Яратучы ярлыкамас»

Җир өстенә төшсә Дәҗҗал,

Канлы сугыш, гауга, җәнҗал

Кемгә дә бишек булмас.

Фирдәвес җәннәтләренә

Ачылган ишек булмас.

Нух көймәсе тиранны да

Кала алмас коткарып.

Сүнәр... сүнәр кабынмаска

Фани дөнья утлары...

Яный бүген тереклеккә

Давыл алды тынлыгы.

Карагруһлар өеренең

Кабих астыртынлыгы.

Барчабызны да йотмасмы

Караңгылык чоңгылы?

...Кайсы диндә чагылмаган

Кыямәтнең чынлыгы?. 
Һәр чорда да бәндә – корбан...

Юкмы сайлау хокукы?

Ахрысы ул язылганны

Укый белмәгән сукыр...

Күргәннәр урап узалар

Алдында торса упкын.

...Безме – иманнан язганнар,

Безме – тәмугка утын?..

...Җирдән күкләргә тоташкан

Уйларым дулкын-дулкын.

Үз язмышы белән инсан

Уйнар кайчанга кадәр?

Яратучы ярлыкамас,

Гөнаһка батсак әгәр...