Хәйдәр Гыйльфанов: Рәсми рәвештә 50 мең татарны югалтуның бер сәбәбе - безнең мәнсезлек
Татарстанның Свердловск өлкәсендәге даими вәкиле Хәйдәр Гыйльфанов җанисәп нәтиҗәсендә татарлар кимүенең сәбәпләрен әйтте.
«Без 50 мең татарны рәсми рәвештә югалттык. Сәбәбе, беренчедән, үзебезнең мәнсезлек, икенчедән, дәүләтнең салкын карашы», - диде ул «Татмедиа»дан Екатеринбургка килгән журналистлар делегациясенә.
Аның фикеренчә, җанисәпне оештыру тиешле дәрәҗәдә оештырылмаган.
«Мин башка елларда булган җанисәпләр белән чагыштыра алам. Безгә халык исәбен алучы керә иде, хәзер танышларның күбесенә кермәгәннәр. Мин үзем сайт аша уздым. Миңа калса, дәүләтнең үзендә кемнәр яшәгәнен беләсе килми», - ди ул.
Ул җанисәпне оештыру һәм уздыру буенча авылларда проблемалар булмавын әйтте.
«Безнең җитешсезлек булды. Үзебезнең халык исәбен алучыларны билгелисе булган. Авыллар буенча проблемалар булмады, әмма шәһәрләр буенча алай әйтеп булмый. Без шәһәрдә кырыкка якын чара үткәрдек, әмма зур шәһәр эчендә алар эреп югала кебек», - диде ул.
Гөлүзә Ибраһимова
Следите за самым важным и интересным в Telegram-каналеТатмедиа
Нет комментариев