Владимир Путин Коръәнне ихтирам итмәү Россиядә җинаять булып саналуын искәртте

Россия лидеры шәһәрнең Җәмигъ мәчетенә килгәч, җирле мөселман оешмасы рәисе Сәед-Яхья Сәедов аңа Коръән бүләк итте. «Бу бүләк өчен сезгә зур рәхмәт. Ул, һичшиксез, Кремльдә лаеклы урын алачак», - диде Президент.

Шул ук вакытта, Путин теге яки бу дин вәкилләре өчен изге саналган әйберләргә карата мыскыллы мөнәсәбәткә төрле илләрдә төрлечә карауларына игътибар итте.

«Коръән – мөселманнар өчен дә, башкалар өчен дә изге әйбер. Без башка илләрдә бүтәнчә эшләүләрен – кешеләрнең дини хисләрен хөрмәт итмәүләрен һәм моны җинаятькә санамауларын беләбез», - дип искәртте ул.

«Безнең илдә бу Конституция буенча да, Россия Федерациясе Җинаять кодексының 282нче маддәсе буенча да – җинаять. Бу – конфессияара ызгыш китереп чыгару», - дип өстәде дәүләт башлыгы.

Путин фикеренчә, христианнар һәм мөселманнар арасындагы туганнарча мөнәсәбәтләр һәм үзара хөрмәт күпмилләтле һәм күпконфессияле Россия халкының бердәмлеген ныгыта. Ул шулай ук Россиядә яшәүче барлык мөселманнарны Корбан бәйрәме белән котлады.

Элегрәк Стокгольм үзәгендәге Медборъярплатсен мәйданында полиция рөхсәте белән Коръән китабын яндыру акциясе булды. Әлеге акцияне 37 яшьлек Гыйрак иммигранты Салван Момика үткәрде, аңа башта мондый демонстрация уздырырга рөхсәт итмәгәннәр иде, дип яза «Татар-информ».