Казанда 2025 елның 1 гыйнварыннан туристлык салымы алына башлаячак

Казан шәһәре Думасының бүген Ратушада узган XXXIV сессиясендә депутатлар шәһәрдә туристлык салымын кертү турында карарны хупладылар, ул 2025 елның 1 гыйнварыннан гамәлгә керәчәк. Утырышта катнашучылар шулай ук ТР башкаласының бюджет процессы турында нигезләмәгә һәм җир салымы, физик затлар мөлкәтенә салым турындагы карарларга үзгәрешләр керттеләр, шулай ук социаль ипотека программасы буенча торак сатып алуга мохтаҗ гаиләләр исемлеген расладылар.

Финанс идарәсе башлыгы Ирек Мөхәммәтшин туристлык салымын кертү буенча карар проектын фикер алышуга чыгарды. Аны 2025 елның 1 гыйнварыннан ала башлаячаклар. Минималь сумма көненә 100 сум тәшкил итәчәк. Бәя теркәлгән булачак. Кунакханәләрдә яшәүчеләр яшәү бәясенең 1% күләмендә киләсе ел дәвамында салым түләячәкләр. Алга таба бәянең ел саен 1% ка артуы каралган. Мәсәлән, 2026 елда – 2%, 2027 елда — 3%, ә 2029 елга күрсәткеч максималь мөмкин булган 5% ка җитәчәк.

Шул ук вакытта Россия Федерациясе Салым кодексында салым түләүдән азат ителә торган гражданнар категорияләре билгеләнгән. Болар — Советлар Союзы Геройлары, Россия Федерациясе Геройлары, Бөек Ватан сугышында катнашучылар һәм инвалидлар, сугыш хәрәкәтләре ветераннары һәм инвалидлары, I һәм II группа инвалидлар, балачактан инвалидлар, инвалид балалар. Дәүләт керемнәре комитеты карары белән шулай ук 18 яшькә кадәрге затларга ташлама бирелгән.

Алга таба депутатлар гамәлдәге ике салымга үзгәрешләр кертте. Беренчесе җир салымы мәсьәләсе булды. Ирек Мөхәммәтшин билгеләп үткәнчә, 2025 елдан кадастр бәясе 300 млн сумнан артык булган объектларга карата бәяләрнең яңа чик күләмнәрен билгеләячәкләр. Салым ставкасы торак төзелеше өчен билгеләнгән, торак фондлары яисә торак-коммуналь хуҗалык объектлары биләгән, шулай ук шәхси ярдәмче хуҗалык алып бару өчен сатып алынган җир кишәрлекләренә карата 1,5% тәшкил итәчәк (һәркайсының бәясе 300 млн сумнан артыграк). Үзгәрешләр 1 гыйнвардан үз көченә керә.

Күп балалы гаиләләрдәге балигъ булмаган балалар салым түләүдән тулысынча азат ителә. Гражданның даими яшәү урыны булган торак йорты урнашкан бер җир кишәрлегенә карата салым ташламасы бирелә.

Ирек Мөхәммәтшин хәбәр иткәнчә, 2025 елның 1 гыйнварыннан салым базасы кадастр бәясе буларак билгеләнгән күчемсез милек объектлары исемлеге киңәйтелә. Аңа 1 мең квадрат метрдан артык мәйданлы административ-эшлекле үзәкләр һәм 1 меңнән 2 мең квадрат метрга кадәр мәйданлы сәүдә үзәкләре өстәләчәк.

Юридик затларга караган объектлар өчен ТР Законында 2% күләмендә ставка билгеләнгән. Докладчы сүзләренә караганда, узган айда республика дәрәҗәсендә салым салуга салмак күчү максатларында (бу процесс 2025 елдан башлап өч ел дәвам итәчәк) оешмалар милкенә салым ставкасы 1,2% күләмендә түбәнәйтелгән. Бәясе 300 млн сумнан артык булган кыйммәтле объектлар искәрмә булып тора, алар буенча ташламалы ставка 2025 елга гына билгеләнә. Түбән ставка турындагы карар физик затларга да кагыла – мондый объектларның яисә алардагы биналарның милекчеләренә.

Депутатлар шулай ук ТР башкаласының бюджет процессы турында нигезләмәгә үзгәрешләр кертү мәсьәләсен дә карадылар. Ирек Мөхәммәтшин керем администраторлары вәкаләтләрен дебиторлык бурычларын түләтү вәкаләтләрен гамәлгә ашыру регламентларын билгеләү буенча нигезләмә белән тулыландырырга тәкъдим итте. Бу бюджетларның керемнәре буенча тупланган дебиторлык бурычлары күләмен арттырмаска һәм киметергә мөмкинлек бирәчәк, шулай ук эшнең үтә күренмәлелеген һәм нәтиҗәлелеген арттырачак.

Казанның Торак сәясәте идарәсе башлыгы Руслан Гыйлфанов социаль ипотека программасы буенча торак алуда ашыгыч ярдәмгә мохтаҗ гаиләләрнең өстәмә исемлеген раслау тәкъдиме белән чыкты. Исемлеккә авыр тормыш хәленә эләккән һәм тораксыз калган гаиләләр, шулай ук махсус хәрби операциядә катнашучының гаиләсе кергән.

Моннан тыш, җыелучылар 2023—2025 елларга Казан муниципаль милеген хосусыйлаштыру программасына үзгәрешләр кертү турында фикер алыштылар. Җир һәм милек мөнәсәбәтләре комитеты рәисе Ренат Галәветдинов аңлатканча, фаразланган планга 7 объект өстәлгән. Аларның икесе — гомуми мәйданы 760 квадрат метрдан артык булган подвал бүлмәләре һәм 1 мең квадрат метрдан артык мәйданлы беренче каттагы тагын биш бүлмә.

Депутатлар барлык кертелә торган үзгәрешләрне һәм әйтелгән тәкъдимнәрне хупладылар.

kzn.ru