«Язучы» нәшрияты якут халкының бөек язучысы китабын татар телендә бастырып чыгарды

«Саха әдәбиятының алтын фондын тәшкил итүче, якут совет әдәбиятына нигез салучы Платон Ойунскийның әлеге китабына Якут-Саха Республикасында популярлык яулаган дүрт хикәясе туплап бирелде. Үз халкының күңел байлыгын чагылдырган әлеге әсәрләр татар укучысы өчен дә кызыклы булыр дип ышанабыз», диелгән Татарстан Язучылар берлегенең хәбәрендә.

Хикәяләрне Гөлсинә Хәмидуллина тәрҗемә иткән. Китап мәшһүр якут рәссамы Иннокентий Корякин рәсемнәре белән бизәлгән, тиражы 500 данә.

«Укучыларның ихтыяҗына карап ул тираж арта алачак. Якутия язучылары берлегенең 90 еллыгына шундый бүләк ясавыгыз өчен рәхмәт, каләмдәшләр!» дип язган Якутия Язучылар берлеге җитәкчесе, Якутиянең халык язучысы Наталья Харлампьева.

Ул әлеге китап чыгу тарихын ике халыкның язучылары дус яшәвенә бәйләп аңлата. Елена Слепцова-Куорсуннаах үзләренең бөек язучысы Платон Ойунский китабын Рафис Корбанга тапшырган. Аның аша китап Ркаил Зәйдулла кулына килеп кергән. Ул әсәрләрне бик ошатып аны татар укучысына да җиткерергә теләгән һәм «Язучы» нәшриятында чыгарырга карар иткән.

«Татар дусларыбыз 27 ноябрьдә безгә кунакка киләчәк һәм без бергәләп Платон Ойунскийның татар телендә чыккан китабына презентация ясарга җыенабыз», диелгән аның язмасында

Якутия язучылары татар дусларын буш кул белән көтми. Алар якут телендә «Татар балалар әдәбияты антологиясе»н чыгарганнар.

Рузилә Мөхәммәтова

«Татар-информ»