Рифкать Закиров: Яшен булып сукмам беркайчан да Һәм яумам да җиргә таш булып!..
Рифкать Закиров 1938 елның 16 июнендә Актаныш районы Усы авылында дөньяга килә. Әтисе Ватан сугышында һәлак булганлыктан, Рифкатькә дөньяның бар ачысын бик яшьли татып үсәргә туры килә. Сигез яшеннән көтү көтә, аннан колхоз эшенә җигелә. Шагыйрьнең байтак гомере читтә уза: ул Ерак Көнчыгышта, Урал якларында төзүче, шахтер булып эшли, авыр физик эш арасында иҗат итәргә дә форсат таба.
