«Апуш» балалар театр студиясе мәктәп укучыларына һәм аларның әти-әниләренә Тукай иҗатына багышланган спектакль күрсәтәчәк

1 нче октябрьдә Казанның «Апуш» балалар театр студиясе мәктәп укучыларына һәм аларның әти-әниләренә спектакль күрсәтәчәк. Тамашачылар татар шагыйре Габдулла Тукай иҗатына багышланган спектакльне караячак. Алар чират буенча төп рольләрне башкарачаклар.

«Апушның тылсымлы төшләре» спектакле драматург Равил Бохараев пьесасы буенча Мөдәррис Әгъләмов тәрҗемәсендә куелган. Постановкага музыканы композитор Зөлфәт Вәлиуллин язган, ә спектакльнең сценографы, рәссамы – Казан сәнгать училищесы студенты, Г.Камал театрының баш рәссамы Сергей Скомороховның укучысы Анна Новикова. Яшь актерларга спектакль өчен махсус костюмнар да тектерелгән. 

Спектакльнең төп герое – бәләкәй Апуш. Төшендә ул Су анасы, Шүрәле, Йорт иясе һәм башка персонажлар белән очраша. Әсәрдәге Апушның тылсымлы төшләре киләчәктә татар әдәбиятының алтын мирасына әвереләчәк бөек Тукай әкиятләренең башлангычы. 

Тамаша «Сәйдәш» мәдәният үзәгендә 16:00 сәгатьтә күрсәтеләчәк. Укучылар һәм аларның әти-әниләре шулай ук үз ишекләрен бу елның февралендә ачкан студия эшчәнлеге белән дә таныша алачаклар. 

Исегезгә төшерәбез, беренче тапкыр «Апушның тылсымлы төшләре» спектаклен 6 нчы июньдә күрсәттеләр, аны Казан Мэры Илсур Метшин карады. Премьера көнне спектакльне бер состав уйнаган булса, бу юлы «Апушның тылсымлы төшләре»ндә рольләрне башка состав тәкъдим итәчәк, дип хәбәр итә Казан Башкарма комитетының Тел культурасы өлкәсендә милли сәясәтне гамәлгә ашыру бүлеге матбугат хезмәте. 

«Апуш» балалар өчен татар театр студиясе Казан Мэриясе патронажы астында ачылды. Проект февраль аенда старт алды – ул вакытта кастинг буенча 9 яшьтән алып 15 яшькә кадәрге 100 баладан 30 укучы сайлап алынды. Илсур Метшин инициативасы белән «Апуш» театр студиясе сентябрьдә тагын ике мәдәният үзәгендә ачылды. Кастинглар ярдәмендә Ленин исемендәге мәдәни-ял комплексындагы «Апуш» студиясенә – 33 укучы, «Чулпан» мәдәният үзәгендәге «Апуш» студиясенә 23 укучы сайлап алынды. 

Балалар дәресләргә бушлай йөриләр. Алар белән сәхнә теле, актерлык, вокал буенча танылган артистлар шөгыльләнә. Балалар педагоглар белән бергә татар телендә спектакльләр әзерлиләр, мастер-классларда катнашалар. Студияне актерлык осталыгы буенча педагог, «Перспектива» гранты иясе Алия Фәйзрахманова җитәкли.

kzn.ru