Казанда эшчеләр өчен «талаш»
Күз тимәсен, Татарстан башкаласының хезмәт базарында уңай халәт күзәтелә-эшсезләр саны кими башлаган. Казанның халыкның мәшгульлек үзәге директоры Тимур Муллин “эшлекле дүшәмбе” киңәшмәсендә хәбәр иткәнчә, хәзер мәшгульлек үзәкләрендә “эш урынсыз” сыйфатында 9 мең 921 кеше исәптә тора.
– Узган елның шушы чоры белән чагыштырганда, эшсезләр саны 2,5 мәртәбәгә кимеде. Ел ахырына эшсезләр саны 1,1 процентны тәшкил итәр дип фаразланыла. Эш сорап мөрәҗәгать иткән 12 меңнән артык кешенең 11 меңнән артыгы яңа эш урыны тапты. Шул исәптән, мәшгульлек үзәкләрендә исәптә торган 8 мең эш урынсыз эшкә урнашты. Эшкә урнаштыру күрсәткече 90,6 процентка җитте, – диде Тимур Муллин.
Бу хәлгә Казан мэры Илсур Метшин уңай бәя бирде.
– Шәһәрдә хезмәт базары акрынлап элекке халәтенә кайта бара. Халык белән җитди эшләр башкарылды, Казанда 11 мең кеше эш тапты, икътисад тотрыклылана. Казанда хезмәт базары халәте Россия күләмендә караганда яхшырак, – диде Илсур Метшин.
Кешеләр транспорт, сәүдә, сәнәгать, сәламәтлек саклау, төзелеш тармакларына эшкә урнашкан. Тимур Муллин әйткәнчә, сәнәгатьнең кайбер өлкәләрендә кадрларга зур ихтияҗ сизелә. Шунлыктан, предприятиеләр һөнәре һәм тәҗрибәсе булмаган кешеләрне дә, өйрәтү максатында, эшкә алалар икән.
Мэр Илсур Метшин сөйләшүгә йомгак ясап: “Эшче кадрлар һәрвакыт кирәк. Казанда Вознесение тракты, Горький шоссесына янәшә юл төзелеше һәм башка әһәмиятле проектлар гамәлгә ашырыла. Халыкара олы чаралар үткәрелмәсә дә, без җитди инфраструктура проектларын башкарабыз. Моның өчен эшче куллар санын арттыру зарур. Төзелеш мәйданнары күбрәк булган саен, эшчеләр һәм белгечләр дә күбрәк таләп ителә”, – диде.
Дамир Бәдриев
Следите за самым важным и интересным в Telegram-каналеТатмедиа
Нет комментариев