АЙГА КЫРЫН КАРАМА

21 февраль (шимбә). Җөмәдел әүвәл аеның 2 нче көне. 4 нче Ай тәүлеге. Ай Кучкар йолдызлыгында, 7.41 сәгатьтә калка, 20.46 сәгатьтә бата. 1 нче фаза. Көн озынлыгы 10.06 сәгать.

Акыл эшчәнлеге көчле, баш бик шәп эшли, күп кызыклы фикерләр туа. Урамда аеруча игътибарлы булырга, имгәнү-егылудан сакланырга кирәк. Көнне ялгыз үткәрү уңай нәтиҗә бирә. Карарларны уйлап кабул итү мәслихәт. Баш, сизү әгъзалары, тамак, тавыш ярылары зәгыйфь. Ай Кучкарда чакта кешеләр еш бәхәсләшә, тик кемгәдер ачу сакламау зарур - ул, җыела барып, җитди авыру китереп чыгарырга мөмкин.

Уяу булу зарур

Кардиологлар фикеренчә, 35 яшьтән соң һәр кеше артериаль кан басымын контрольдә тотарга тиеш - нәкъ шул яшьтә гипертония башлану ихтималы зур. Шунлыктан әледән-әле тикшеренергә: көндәлек табыннан майлы һәм холестеринлы ризыклар санын киметергә; тәмәкене ташларга; ябыгырга; физик активлыкны арттырырга кирәк. Кан тамырларын чистарту өчен, 5әр аш кашыгы нарат ылысы һәм суган кабыгын, 3 аш кашыгы гөлҗимешне 4 стакан суда кайнатып, җылы урында төн буе төнәтәләр, иртән сөзеп, көненә 3-5 тапкыр эчәләр, һәр порциягә 1 чәй кашыгы яңа сыгылган лимон согы кушалар.

22 февраль (якшәмбе). Җөмәдел әүвәл аеның 3 нче көне. 5 нче Ай тәүлеге. Ай Кучкар йолдызлыгында, 8.07 сәгатьтә калка, 22.09 сәгатьтә бата. 1 нче фаза. Көн озынлыгы 10.09 сәгать.

Яңалыкка, көтелмәгән куанычлы хәбәрләргә бай көн. Юлда булу әйбәт. Ач торырга ярамый. Бүген бөтен ризык тулысынча эшкәртелә. Бронхлар, өске сулыш юллары зәгыйфь. Ай Кучкарда чакта теш һәм аңкаулар сәламәтлегенә игътибар итәргә кирәк.

23 февраль (дүшәмбе). Җөмәдел әүвәл аеның 4 нче көне. 6 нчы Ай тәүлеге. Ай Үгезбозау йолдызлыгында, 8.35 сәгатьтә калка, 22.59 сәгатьтә бата. 1 нче фаза. Көн озынлыгы 10.14 сәгать.

Сизгерлек, тәэсирләнүчәнлек арта. Күбрәк аралашу хуплана - бүген теләсә нинди элемтәләр күңелгә ятышлы була. Ялкаулык хисе уянырга мөмкин. Кан әйләнеше системасы, ияк, муен, үпкә, бронхлар зәгыйфь. Тынгысыз көннәр артта калды, хәзер тышкы кыяфәт, сәламәтлек турында күбрәк кайгыртырга кирәк. 23-25 февральдә рассадага борыч, баклажан, томат, кыяр, кәбестә орлыклары чәчү, тәрәзә төбендә үстерү өчен укроп, петрушка, шпинат чәчү, бүлмә гөлләрен күчереп утырту уңай нәтиҗә бирә.

24 февраль (сишәмбе). Җөмәдел әүвәл аеның 5 нче көне. 7 нче Ай тәүлеге. Ай Үгезбозау йолдызлыгында, 9.06 сәгатьтә калка, 23.27 сәгатьтә бата. 1 нче фаза. Көн озынлыгы 10.18 сәгать.

Буш сүз сөйләмәскә кирәк. Әйткән сүзләргә игътибарлы булу сорала - кычкырып әйтелгән һәр теләк тормышка ашырга мөмкин. Ашауда чама хисен югалтмау хәерле. Үпкә, аяклар зәгыйфь. Ай Үгезбозау йолдызлыгында булган көннәрдә көнкүреш мәсьәләләре җиңел хәл ителә. Мәхәббәт, наз тантана итә. Салкын тию ихтималы зур. Теш алдырырга ярамый.

Суган һәм сарымсак (1)

Авитаминоз һәм иммунитет белән бәйле бөтен проблемаларны диярлек суган һәм сарымсак хәл итә ала. Өшегән урынны уылган чи суган белән ышкырга кирәк. Томау төшкәндә, изелгән суганны марляга төреп, 10-15 минутка борынга куялар, яки 1 өлеш сарымсак согын 2 өлеш үсемлек маена кушып, борынга тамызалар. Пешкән суганны эренле шеш өстенә ябалар. Ютәлләгәндә, бронхит һәм коклюш булганда, ярты кило туралган суган, 400 грамм шикәр, 50 грамм балны 1 литр суда 3 сәгать пешерәләр дә, көненә 3-4 тапкыр 2шәр аш кашыгы кабалар.

25 февраль (чәршәмбе). Җөмәдел әүвәл аеның 6 нчы көне. 8 нче Ай тәүлеге. Ай Игезәкләр йолдызлыгында, 9.41 сәгатьтә калка, 0.41 сәгатьтә бата. 2 нче фаза. Көн озынлыгы 10.23 сәгать.

Авантюра яратучылар өчен уңай көн. Кирәкле кәгазьләр югала, планнар җимерелә, бөтен кеше кабалана, соңга кала. Ач тору, ашказанын һәм эчәклекне чистарту әйбәт нәтиҗә бирә. Йөрәк һәм кан тамырлары зәгыйфь, гипертоник криз булуы ихтимал, баш миен киеренкелектән саклау мөһим.

Суган һәм сарымсак (2)

Чи суган суы белән сөял бетерәләр, җәрәхәт төзәтәләр, чәч ныгыталар. Суган һәм сарымсакта фитонцидлар күп, берничә минут сарымсак чәйнәгәндә, авызда бернинди бактерия дә калмый. Әмма грипп белән авырганда күп итеп сарымсак ашарга ярамый, чөнки аның актив матдәләре кан басымын күтәрә, бөерләргә авырлык китерә. Суган белән сарымсакны авыруны кисәтү өчен кулланырга кирәк.

26 февраль (пәнҗешәмбе). Җөмәдел әүвәл аеның 7 нче көне. 9 нчы Ай тәүлеге. Ай Игезәкләр йолдызлыгында, 10.23 сәгатьтә калка, 1.46 сәгатьтә бата. 2 нче фаза. Көн озынлыгы 10.27 сәгать.

Авыр энергетикалы көн. Үзеңне үпкәләткән кешеләрне кичерү мөһим. Ай 2 нче фазада чакта организмның көче мул, күп нәрсә уңышлы була, әмма җитди рәсми сөйләшүләр үткәрү өчен начар вакыт. Бизләр системасы, җилкә, кул, күкрәк сөяге, ашказаны зәгыйфь. Мунча керү файдалы.

27 февраль (җомга). Җөмәдел әүвәл аеның 8 нче көне. 10 нчы Ай тәүлеге. Ай Кысла йолдызлыгында, 11.10 сәгатьтә калка, 2.44 сәгатьтә бата. 2 нче фаза. Көн озынлыгы 10.32 сәгать.

Теләсә нинди эш башлау, актив ял итү, сәламәтлекне ныгыту өчен уңай көн. Туганнар белән күрешү, мөнәсәбәтләрне җайга салу, аңлашулар хуплана. Бөтен булган вак-төяк эшне эшләп бетерү хәерле. Сөякләр системасы зәгыйфь.

Бананлы кекс

2 банан, 3 йомырка, 1 стакан шикәр, 4 аш кашыгы коры сөт, 4 аш кашыгы иссез үсемлек мае, 8 аш кашыгы он, 1 чәй кашыгы сода, серкә кирәк. Йомырка белән шикәрне агарганчы туглап, коры сөт, май өстиләр дә, миксер белән болгаталар. Соданы серкә белән сүндереп - онга, аннары онны йомыркалы шикәргә кушалар. Бананнарны чистартып, турыйлар, изәләр, камырга кушалар. Майланган табага он яки манный сибеп, камырны салалар һәм 40 минут пешерәләр.