Зәйнәп Фәрхетдинова: Илһам абый Шакиров безне үзенең балалары кебек кабул итте

«Илһам абый Шакиров бөеклеге, моңнары, әлбәттә, татар халкына калдырган җәүһәрләреннән, фидакарь хезмәтеннән гыйбарәт. Ул халкыбызның олуг шәхесе, моңлы баласы. Мин бәхетле, филармониягә эшкә кергәндө мине нәкъ ул тыңлап карап кабул иткәне истә. Илһам абый Шакиров безне үзенең балалары кебек кабул итте», — диде ул.

Популяр җырчы әйтүенчә, Илһам Шакиров өйрәтү сүзләрен дә киңәш буларак кына әйтә торган булган, – дип яза «Татар-информ».

«Хәтта кайбер моментларда өйрәтеп җибәргәндә дә, ул өйрәтү сүзләрен киңәш буларак кына әйтә торган иде. Исәнләшкән вакытта да, мин тыйнак кына куллар биреп исәнлек-саулык сорашсам да, ул мине тартып ала иде дә «син минем белән кул биреп кенә түгел, кочаклап исәнләш, яме, Зәйнәп» дип әйтте. Мәңгегә хәтердә калды, дус булып яшәдек. Илһам абыйны киләчәк буыннар да искә алырга, аның җырлары мәңге яңгырап торырга тиеш. Илһам Шакиров исемендәге премия булдыру да бик хуп, ул татар җыры сәнгатен, мәдәниятен тагын да үстерүгә бер этәргеч», — дип ассызыклады ул.

Концерт барышында Зәйнәп Фәрхетдинова да «Халыкчан башкару» номинациясендә Илһам Шакиров исемендәге премия лауреаты булып танылды.

Концерт тамашачылары арасында ТР Мәдәният министры урынбасары Дамир Натфуллин, Казан мэры Илсур Метшин кебек билгеле шәхесләр бар иде.

Юлай Низаев