Мобилизацияләнүчеләрнең гаиләләреннән булган кечкенә сабыйларга коляскалар һәм кием-салым сатып алырга, медицина тикшерүе узарга ярдәм иттеләр

Казанда мобилизацияләнүчеләрнең гаиләләренә адреслы ярдәм күрсәтүне дәвам итәләр. Үз ихтыяҗлары турында мохтаҗлар күбрәк район администрацияләренә җиткерә, алар үз көчләре яисә оешмалар һәм эшкуарлар ярдәме белән һәр мәсьәләне хәл итә.

Октябрь азагында Хәмидуллиннар гаиләсенә ярдәм итәләр, анда ике баланың әтисе һәм хатынның ире мобилизацияләнә. Хәзер аның хатыны декрет ялында һәм ике бала (улына – 1 яшь тә 8 ай, кызы 19 нчы октябрьдә дөньяга килә) тәрбияли. Бала тудыру алдыннан әнигә коляска алырга булыштылар.

«Тормыш иптәшем белән колясканы соңрак сатып алырга ниятләгән идек, тик өлгермәдек, аны 29 нчы сентябрьдә мобилизацияләделәр. Киров һәм Мәскәү районнары администрациясеннән шалтыраткач, яңа туган бала өчен коляскага мохтаҗ булуыбызны әйттем, минем үтенечемне ишеттеләр. Колясканы үзем теләгәнне сайлап алдым», – ди мобилизацияләнүченең хатыны. Аның сүзләренчә, хәзер ул һәм балалар бернәрсәгә дә мохтаҗ түгел. «Без район администрациясе белән элемтәдә торуны дәвам итәбез. Теләсә кайсы вакытта аларга мөрәҗәгать итә алам һәм миңа ярдәм итәчәкләр», – ди ул.

Мобилизацияләнүчеләрнең гаиләсенә колясканы Казан эшкуары Нарвик Аракелян сатып алырга ярдәм иткән. «Мин читтә кала алмадым, чөнки хәзер хәрби хәрәкәтләр зонасында казанлылар, кардәшләребез бар», – диде ул һәм мохтаҗларның башка категорияләренә дә ярдәм күрсәтүне дәвам итүен җиткерде. «Мин һәрвакыт булышырга тырышам. Хәзер Горький шоссесындагы складка гуманитар йөк салынган машинаны җибәрергә әзерләнәм. Аны тулысынча төйи алдык», – ди эшкуар.

Ире һәм әтиләре 25 нче сентябрьдә мобилизацияләнгән Зиннуровлар гаиләсенә бер яшьлек сабыйга кием алырга ярдәм иткәннәр. Хәзер әни декрет ялында. Баланың инде киемнәре кечерәйгән, шуңа күрә җылы әйберләр, шул исәптән өйгә дә әйберләр сатып алырга кирәк иде. «Мин район администрациясе хезмәткәрләренә безнең проблема турында сөйләдем һәм алар хәл итәргә булышты. Кибет адресын бирделәр, анда мин водолазка, чалбар, бала өчен юрган һәм башка әйберләр сайладым», – ди мобилизацияләнүченең хатыны. Аның сүзләре буенча, кибет хезмәткәрләре бик ачык булган. «Алдан бүлеп бирелгән акчадан күбрәк суммага товар алган идем, тик кибет хезмәткәрләре миннән өстәмә акча алмады», – дип искә ала әни.

Зиннуровлар гаиләсенә дә медицина тикшерүен узарга ярдәм иткәннәр, хәзер күз табибында тикшерү мәсьәләсе хәл ителә. «Район администрациясе белән элемтәне дәвам итәбез. Алар безгә даими рәвештә шалтыратып, ихтыяҗларыбыз белән кызыксына», – диде әңгәмәдәшебез.

Мобилизацияләнүчеләрнең гаиләләренә шулай ук «Игелекле Казан» фонды да ярдәм итә. Бүгенге көндә оешма волонтерлары 103 гаиләне патронаж астына алдылар, 44 гаиләгә – балалар ризыгы, 18 гаиләгә дарулар сатып алырга булышты. Шулай ук «Игелекле Казан» 14 гаиләгә дәвалану өчен түләгән, тагын икесенең көнкүреш техникасын ремонтлаган. Волонтерлар 23 гаиләгә балаларын мәктәпләргә һәм балалар бакчаларына озатырга, хайваннар белән йөрергә булышкан.

«Хәзер без мохтаҗларга азык-төлек һәм дарулар китерү өчен машиналары булган волонтерларга бик мохтаҗ. Шулай ук хайваннар белән урамда йөреп керергә дә иреклеләр җитми», – дип сөйләде «Игелекле Казан» коммерцияле булмаган автоном оешмасы директоры Татьяна Мерзлякова. Мобилизацияләнүчеләрнең гаиләләренә булышырга теләүчеләр +7(843)558-74-18 телефоны аша мөрәҗәгать итә алалар. Шулай ук «Игелекле Казан» коммерцияле булмаган автоном оешмасының Сеченов ур., 5 адресы буенча урнашкан коворкингына шәхсән мөрәҗәгать итәргә була.

Исегезгә төшерәбез, Казанда мобилизацияләнүчеләрнең гаиләләренә ярдәм итү буенча шәһәр чаралары гамәлдә: җәмәгать транспортында бушлай йөрү, мәктәпләрдә ике тапкыр кайнар ризык белән туклану, балалар бакчаларына бару һәм аларда туклану. Шулай ук «Батыр» карталары буенча балалар спорт объектларында бушлай шөгыльләнә һәм мәдәният учреждениеләренә йөри ала. Ярдәм чаралары турында мәгълүматны сылтама аша белергә мөмкин.

Шул ук вакытта Башкарма комитет мобилизацияләнүчеләрнең гаиләләренә адреслы ярдәм күрсәтә: баланы балалар бакчасына алу яки күчерү белән бәйле 47 мөрәҗәгать буенча карар кабул ителгән, 8 гаилә торак-коммуналь хуҗалыгы хезмәтләренә чыгымнарны каплауда һәм түләүләрне кичектереп торуда ярдәм иткән. Тагын бер гаиләгә шәхси йортны газга тоташтыруда оператив ярдәм күрсәтелгән. 17 гаилә өчен медикаментлар сатып алып, тар белгечләрдән тикшеренү узарга ярдәм иттеләр, 10 гаиләдәге балаларга киемнәр һәм коляскалар сатып алдылар.

Халыкны эш белән тәэмин итү үзәге 800 дән артык гаиләгә консультация биргән. Аларга үзәкнең хезмәтләре һәм «Демография» илкүләм проекты кысаларында һөнәри белем алу мөмкинлеге турында сөйләделәр. 5 мобилизацияләнгән казанлыларның хатыннарына эшкә урнашырга ярдәм иттеләр. Социаль хезмәт күрсәтү комплекслы үзәге белгечләре 13 мөрәҗәгать эшкәрткән, халыкка социаль хезмәт күрсәтү тәртибе турында сөйләгәннәр, 2 кешене патронаж астына алганнар. Шулай ук үзәк тернәкләндерү үзәге өчен документлар рәсмиләштерергә ярдәм итә.

Мохтаҗларга теләге булган һәркем ярдәм итә ала. Моның өчен исемлектәге 17 гуманитар ярдәм пунктының берсенә әйберләр китерү дә җитә. Алар көн саен 10:00 сәгатьтән 20:00 сәгатькә кадәр эшлиләр.

Юлия Летникова

kzn.ru