Мәдәни җомга

Йөрәктән-йөрәккә, яки Буран эчендә якты ут

«Әкият» балалар үзәгендә «Йөрәктән - йөрәккә» хәйрия проектының гала-концерты узды. Балалар йортлары, интернатларда тәрбияләнүче, тернәкләндерү үзәкләрендә дәваланучы физик мөмкинлекләре чикле сабыйлар алдында Алинә Шәрипҗанова, Алена Федянина, Алмаз Әхмәтҗанов, «Болгар кызлары», «Әкият» курчак театры артистлары, «Шарм» театры биючеләре һ.б. чыгыш ясады. Һәрбер балага тәм-томнар, Казан сәнгать училищесы һәм халык һөнәрчелеге техникумы...

«Әкият» балалар үзәгендә «Йөрәктән - йөрәккә» хәйрия проектының гала-концерты узды. Балалар йортлары, интернатларда тәрбияләнүче, тернәкләндерү үзәкләрендә дәваланучы физик мөмкинлекләре чикле сабыйлар алдында Алинә Шәрипҗанова, Алена Федянина, Алмаз Әхмәтҗанов, «Болгар кызлары», «Әкият» курчак театры артистлары, «Шарм» театры биючеләре һ.б. чыгыш ясады.
Һәрбер балага тәм-томнар, Казан сәнгать училищесы һәм халык һөнәрчелеге техникумы укучылары ясаган бүләкләр бирделәр.
«Йөрәктән-йөрәккә» проекты агымдагы елның башында старт алган иде. Ел дәвамында респуб­ликабыз театрлары, музейлары, концерт оешмаларының балалар, картлар йортларына, тернәкләндерү үзәкләренә баруы оештырылды.
Концерт дәвамында артистлардан бигрәк сабыйларны күзәтү кызык иде. Аларның күбесе өчен дөнья телевизор экраны белән чикләнә. Ә концертта Кыш бабайны, Кар кызын, аллы-гөлле утлар, кызыл, сары, яшел, зәңгәр шарлар, фейерверк күреп башлары әйләнде бугай. Тамаша алдыннан сабыйларны биетергә, уйнатырга тырышкан артистларга алар башта тарсынып кына җавап бирсә, концерт дәвамында тәрбиячеләренең җылы кочакларыннан курыкмыйча, хәтта батыраеп төшә башладылар, ә ахырдан язмыш тарафыннан кыерсытылган нәни кешеләрне Кыш бабай, Кар кызы, әкият геройлары киемнәрен киеп чыккан артист халкыннан аерып алып булмый иде.
Балалар «Әкият» үзәгеннән тиз генә җыенып китә алмады, башта киенмичә озак кына сәхнә тарафларына каерылып карап торды, аннары зиһеннәрен туплый алмыйча бияләй-фәләннәрен югалтып тәрбияче апаларын интектерде. Чынлык­та, бу югалтуларның күбесе хәйлә генә, ахрысы. Сабыйларның максаты - әкияти бәйрәм мохитендә озаккарак тукталу иде. Биредә алар үзләрен бүтән балалар кебек бәхетле хис итә, игътибар үзәгендә коена, ярату, наз тоя бит. Ә тәрбиячеләр аларның барган җирләреннән тиз генә җыенып кайта белмәү гадәтләрен әйбәт белә, шуңа ашыктырмый, орышмый, сабыр гына көтә иде. Көтеп арыгач, кайтып, бүләкләрне иркенләп карау тәкъдимен әйттеләр. Һәм бу сүз балаларга Кыш бабайның бер кагылуда бөтен тереклекне кар-бураннарга төрендерә торган тылсымлы таягы сыман тәэсир итте. Югалган бияләйләр, шарфлар, оекбашлар шунда ук табылып, нәни тамашачыларны «Әкият» үзәгеннән буран очырткан кебек булды.
Җир йөзендә әле тагын күп тапкыр бураннар кубар. Әмма Мәдәният министрлыгы оештырган шушы хәйрия концерты аны карарга килгән сабыйларның байтагы өчен иң якты хатирә булып калыр, мөгаен.
Миләүшә ГАЛИУЛЛИНА.

Нравится
Поделиться:
Реклама
Комментарии (0)
Осталось символов: