«Уйнагыз гармуннар!» бәйрәмендә гармунчылар парады алдыннан Илсөя Бәдретдинова барачак

Фестиваль быел XXXVIII тапкыр үткәрелә. Чара 11:00 сәгатьтә Камал театры алдындагы мәйданда концерт программасы белән башлана. Бөтендөнья татар конгрессының Башкарма комитеты җитәкчесе Данис Шакиров сүзләренчә, «Уйнагыз гармуннар!» үзен фестиваль буларак кына түгел, ә халык бәйрәме буларак раслады. Бу хакта ул «Татар-информ» мәгълүмат агентлыгында узган матбугат очрашуында сөйләде.

«Уйнагыз, гармуннар!» фестивале Казанда халкыбызны туплый торган, халык күңеленә барып җитә торган, җылы кабул ителгән чара. Халкыбызның яшәешен гармуннан башка күз алдына китереп булмый. Гармунчылар саны азая диләр, мин килешмәс идем. Чарага меңнән артык катнашучы килә. Сәхнәдә төбәкләрдән килгән виртуоз гармунчылар да чыгыш ясаячак. Ике ел гармунчылар парадын Фирдүс Тямаев җитәкләде. Быел Илсөя Бәдретдинова була. Аның төркемендә баянчылар, гармунчылар бар. Алар да булачак», – диде ул.

Шакиров сүзләренчә, концерт барышында «Татар халкының милли үзенчәлеге» дәүләт программасы кысаларында иҗат коллективларына милли костюмнарга сертификатлар, тальян гармуннар тапшырылачак.

14:00 сәгатьтә «Гармунчылар парады» башлана. Гармунчылар һәм татар фольклор иҗат коллективлары Бауман урамы буйлап Кремль яр буена кадәр уза. 15:00 сәгатьтә Яр буенда концерт башлана.

Гөлүзә Ибраһимова

"Татар-информ"