Сабантуй һәм Каравон: республикада бәйрәмнәрне үткәрү даталары расланды

Татарстанда Сабантуй һәм Каравон бәйрәмнәрен үткәрү даталары расланды. Кичә Татарстан Республикасы рәисе Рөстәм Миңнеханов тиешле указларга кул куйган иде, – дип яза Казан мэриясе.

24 майда Татарстан Республикасы Лаеш районының Никольское авылында рус халык бәйрәме «Каравон» уздырылачак.

7 июньнән 8 июньгә кадәр Татарстан Республикасы торак пунктларында һәм район үзәкләрендә татар халык бәйрәме Сабантуй узачак. 14 июньдә аны Чаллыда, ә 21 июньдә Казанда билгеләп үтәчәкләр.

Сабантуй һәм Каравон — язгы кыр эшләре тәмамлану белән бәйле бәйрәмнәр. Бу көннәрдә республикада халык күңел ачулары, уеннар, конкурслар, ярминкәләр уза. Ике бәйрәм дә хезмәтнең, бердәмлекнең һәм мәдәни гореф-гадәтләрне саклауның мөһимлеген ассызыклый.