ЭФИРДА – “МӘДӘНИ ҖОМГА” (АУДИО)

Ә без исә “Мәдәни җомга” газетасының кайнарлыгы гаепле түгелме икән, дип шикләнәбез. Чыннан да, ел башыннан бирле редакциядә эш кайнап, ялкынланып, гөрләп тора. Газетаны ачып укый башласаң да, “ВКонтакте”, “Телеграм” социаль челтәрләрендәге төркемнәренә керсәң дә – аерылып булмый.  “Мәдәни җомга” газетасы шушы кыска гына вакыт эчендә республикабызның кайнап-ялкынланып торучы әдәбият, мәдәният, сәнгать тормышын чагылдырып баручы көзгесенә, елъязмачысына әверелде.

Менә шуларны күрептер инде, тыңлаучыларыбыз арасыннан газета редакциясе белән эфирда очраштырубызны сорап мөрәҗәгать итүчеләр күбәеп китте. Хәер, үзебез дә нәкъ шуны уйлап тора идек, чөнки “Мәдәни җомга”ның оешуына 30 ел тулып килә бит. Шушы датага ничек әзерләнүләрен, нәрсәләр планлаштыруларын үзебезнең дә беләсебез килеп йөри иде. Тыңлаучыларыбызның үтенече бу очрашуны тагын да тизләтеп җибәрде. Шул рәвешчә, Татарстан радиосы дулкыннарында “Мәдәни җомга” бездә кунакта” дигән тапшыру яңгырады. Баш мөхәррир Ләбиб Лерон, журналистлар Миләүшә Галиуллина һәм Рәшит Минһаҗ фикерләре беркемне дә битараф калдырмас, дип уйлыйбыз.

Сәхифәне Нәсим АКМАЛ әзерләде.