ФИДАКАРЬЛӘР ТОТА ДӨНЬЯНЫ (АУДИО)

Ул Татарстан Республикасы Рәисе каршындагы татар телен һәм Татарстанда яшәүче халыклар вәкилләренең туган телләрен саклау һәм үстерү мәсьәләләре комиссиясе ярдәме белән әзерләнә.

Кемнәр соң ул фидакарьләр? Алар – гомерләрен татар телен һәм әдәбиятын укытуга багышлаган, нинди борчулы, авыр елларда да әлеге эшеннән ваз кичмичә, укучылары күңелендә туган телгә мәхәббәт тәрбияләүче укытучылар һәм бакча тәрбиячеләре. “Фидакарьләр” тапшыруының беренче сезонында алар радиотыңлаучылар алдында эре планда тәкъдим ителде. Без милли мәгариф өлкәсендә әйтер сүзе булган 48 укытучы-тәрбияче белән әңгәмәләр үткәрдек. Анда аларның ирешелгән уңышлары, эш алымнары белән беррәттән, туган телебезнең торышына, киләчәгенә бәйле уй-фикерләре, теләкләре дә киң яңгыраш тапты.

Кем ул бүгенге татар теле укытучысы? Юк, ул кара такта янында кулына китап тотып, грамматика аңлатучы гына түгел. Безнең заманның татар теле укытучысы – ул үз предметын бик яхшы белгән белгеч, туган теленең патриоты, артист та, җырчы да, психолог та. Икенчедән, балалар аңа тартылсын өчен, ул мәктәптә өйдәге әнине алыштыра. Өченчедән, замананың фән-техника өлкәсендәге алдынгы казанышларын иң беренче булып белергә тиешле шәхес.

Бүгенге татар теле укытучысының төп казанышы нәрсә булырга тиеш? Ни кызганыч, күп кенә педагогларныкы сыман, татар теле укытучысының да эшчәнлеге ниндидер баллар, рәсми мактау кәгазьләре белән бәяләнә. Әмма “Фидакарьләр” тапшыруында катнашкан укытучыларның фикеренчә, татар теле укытучысының төп казанышы – укучыларының дәрестән соң, мәктәп коридорында бер-берсе белән татарча аралашулары, укытучыга һәм өлкәннәргә хөрмәте. Татар теле – тәрбиядән башка була алмый.

Татар теле дәресләренең саны кимү, бигрәк тә программада татар әдәбиятына урын калмау барлык укытучыларны да борчый торган проблема. Киләчәктә бу нәрсәгә китерергә мөмкин һәм моннан чыгу юллары бармы? “Фидакарьләр” тапшыруының каһарманнары белән без шундый четерекле сорауларны да читләтеп үтмәдек.

2025 елда тапшыруның өченче сезоны башланып китте. Икенче сезоннан башлап, тапшыруның форматы үзгәрде. Хәзер инде радио студиясенә алдынгы тәҗрибәле татар теле укытучылары үз укучылары белән килеп, радиотыңлаучылар алдында татар теле дәресе үткәрә. Тапшыруда катнашырга дип бер төркем булып редакциягә килеп кергән балалар үзләре үк безнең бүләмәне ямьләндереп, дәрт өстәп китә. Ә студиядә дәрес барышы – үзе бер спектакль! Шушы балаларга ияреп үзеңнең дә бәхетле балачак иленә кайтканыңны, туган тел серләренә төшенгәнеңне сизми дә каласың. “Фидакарьләр” тапшыруы – радио эфирында уникаль бер күренеш һәм формат. Ул радиотыңлаучыларга мәктәптә татар телен укытуда тупланган тәҗрибәне, ирешелгән казанышларны тулырак тәкъдим итәргә, бүгенге катлаулы бер заманда, татарча сөйләшүчеләр, фикер йөртүчеләр көннән-көн кимеп барган бер көндә, мәктәптә эшләүче фидакарь укытучылар, аларның хезмәте белән якыннанрак танышу мөмкинлеге бирә.

“Фидакарьләр” тапшыруы республикакүләм дәрәҗәдә дә билгеләп үтелде. 2024 елда тапшыруның авторы һәм алып баручысы Раил Садри – “Бәллүр каләм” Республика журналистлар конкурсының “Педагог һәм остаз елы”н киң яктырткан өчен” дигән махсус номинациясендә җиңүче булды.   

"Фидакарьләр" тапшыруының барлык чыгарылышларын моннан карый аласыз.