Дүшәмбедән казанлылар сирәк очрый торган астрономик күренешне күзәтә алачак

Татарстан башкаласында яшәүчеләр 17–21 март көннәрендә сирәк очрый торган астрономик күренешне – Венераның икеләтә күренүен күзәтә алачак. Планета кичке сәгатьләрдә 19:00 дан 20:00 гә кадәр, шулай ук иртәнге сәгатьләрдә – 5:00 тән 6:00 га кадәр яхшы күренәчәк. Бу күренешнең уникальлеге шунда – гадәттә Венераны  көннең я беренче, я икенче яртысында карарга мөмкин, дип хәбәр иттеләр КФУ матбугат хезмәтендә.

«Әгәр әлеге күренешнең сәбәпләре турында сөйләсәк, Кояш системасындагы барлык планеталарның Кояш тирәли эллиптик орбиталар буйлап хәрәкәт итүләрен искәртеп үтәргә кирәк. Бу вакытта Венера Җиргә караганда яктылыкка якынрак урнашкан. Шуңа күрә аның кичен дә, иртән дә күзәтеләчәге планеталар белән кояшның үзара торышы туры килү белән аңлатыла, шулай ук «матурлык алиһәсе»нең күк сферасында безнең йолдыздан ерак китмәве белән аңлатыла. Асылда, болар барысы да күк механикасының гади геометриясе», – дип аңлатты КФУның В.П.Энгельгардт исемендәге физика институтының астрономия һәм космик геодезия кафедрасы профессоры Юрий Нефедьев.

Бу көннәрдә планета диск кебек түгел, ә Венера ае дип аталган ай кебек күренәчәк. Күк йөзе аяз булса, шәһәр халкы бу күренешне оптик приборлар кулланмыйча гына күзәтә алачак.

«Кич белән Венера көнбатыш күк ярымшарында бик яхшы күренә. Көнбатыш юнәлештә иң якты йолдызларның берсе гадәттә Венера икәнен барысы да яхшы белә. Иртән, кояш чыккан вакытта планетаны күк ярымшарының көнчыгыш өлешендә күзәтергә мөмкин булачак», – дип сөйләде галим.