Бердәм дәүләт имтиханында ничек 100 балл җыярга: Казан чыгарылыш сыйныф укучылары киңәшләре

Быел Казанда 159 укучы БДИда 100 балл җыйды. 2023 ел белән чагыштырганда имтиханнарны уңышлы тапшырган чыгарылыш сыйныф укучылары саны 70 кешегә арткан. Шул ук вакытта ТР башкаласында тугыз укучы берьюлы ике фән буенча максималь нәтиҗәләргә ирешә алды, ә бер укучы – өчәр фән буенча. KZN.RU порталы чыгарылыш сыйныф укучылары белән аралашты һәм унберенче сыйныф укучысы тормышындагы иң мөһим имтиханга ничек әзерләнергә һәм кайдан ярдәм эзләргә икәнен белде.

«Кәефем кырылмасын өчен башка укучылар белән җавапларымны махсус чагыштырмадым»: Полина Романенко БДИда 398 балл җыйды

Вахитов районының 18 нче мәктәбен тәмамлаган Полина Романенко берьюлы дүрт фән буенча югары нәтиҗәләр күрсәтте. Ул рус теле, рус әдәбияты һәм тарих буенча 100 балл, шулай ук инглиз теленнән 98 балл җыйды.

Кыз сөйләгәнчә, имтиханнарда иң яхшы күрсәткечләргә ирешү максатын ул үзенә унынчы сыйныфта ук куйган. Аның хыялы РФ Тышкы эшләр министрлыгының Дипломатик академиясенә «Халыкара мөнәсәбәтләр» факультетына укырга керү иде, анда бюджет урыны өчен максималь югары баллар кирәк. «Мин бу белгечлек турында алтынчы сыйныф ахырында уйлана башладым, идея белән яндым һәм аны тормышка ашырырга булдым», — дип уртаклашты ул. Кыз үзенең хыялын тормышка ашырды.

Ләкин, тырышып әзерләнүгә карамастан, укучы кыз нинди дә булса предметлардан 100 балл алырмын дип көтмәгән булмаган. «Имтиханнардан чыкканда, кәефем кырылмасын өчен, башка укучылар белән махсус бирем җавапларын чагыштырмадым», – дип белдерде ул.

Бөтен юлда Полинаны аның гаиләсе – әти-әнисе һәм әбисе озата бара. Чыгарылыш сыйныф укучысы билгеләп үткәнчә, әзерлек процессында уку һәм ял балансын саклау мөһим роль уйнаган, чөнки өзлексез мәгълүмат әкренрәк үзләштерелә. Буш вакытларында кыз спорт белән шөгыльләнгән, дуслары белән ял иткән, авылына кайткан, шулай ук фотография белән мавыккан.

Югары баллы нәтиҗәләргә ирешү өчен укучы уку елы башында җәдвал төзергә һәм һәр фәнгә вакыт бүләргә тәкъдим итә – мондый график һәр дисциплинада үз йомшак якларыңны билгеләргә һәм эшләргә мөмкинлек бирәчәк. «Югыйсә шулай килеп чыгуы ихтимал, уку елы ахырында сез ниндидер фәнгә башкаларга караганда начаррак әзер икәнегезне аңларсыз», — дип өстәде Полина Романенко.

«Мин кирәгеннән күбрәк ял иттем»: Камил Шамазов математика һәм информатика буенча имтиханнар өчен 200 балл алды

Полинадан аермалы буларак, Яңа Савин районының Россия Герое А.В. Козин исемендәге 7 нче гимназияне тәмамлаган Камил Шамазов өчен математика һәм информатикадан БДИда йөз баллы нәтиҗәләр сюрприз булмады. Аның сүзләренчә, моны ул баштан ук максат итеп куйган. Рус теленнән имтихан белән бергә Камил 297 балл алды.

Егет үзенең әзерлеген алдан ук – җәй көне 10 нчы сыйныфтан соң башлаган. Камилгә дуслары белән уртак әзерлек һәм әти-әниләренең ышанычы көчле мотивация бирә. Хәзер гимназияне тәмамлаучы гамәли математика һәм информатика юнәлеше буенча Мәскәү физика-техник институтына (МФТИ) керергә планлаштыра.

«Мин бу юнәлешне сайладым, чөнки безнең технологик гасырда IT-белгечлекләр бөтен дөньяда иң актуаль һәм ихтыяҗлылардан санала, һәм бу өлкә минем үземә дә якын», – дип уртаклашты Камил Шамазов.

Ул билгеләп үткәнчә, әзерлекнең мөһим өлеше тулысынча ял итә белү булды. Буш вакытларында укучы дуслары белән шәһәр буйлап йөргән, компьютер уеннары уйнаган һәм вакытын шәһәр читендәге табигатьтә үткәргән. «Башкаларга карап, ни өчендер мин кирәк булганнан күбрәк ял иттем кебек тоела, әмма, шуңа да карамастан, уңышлы әзерләндем», – дип ассызыклады йөз баллы.

Булачак чыгарылыш укучыларына Камил Шамазов хәзер үк әзерләнә башларга киңәш итә. Шул ук вакытта предметлар белән өзлексез шөгыльләнергә кирәкми. Тонуста калу өчен бар нәрсә дә тигез баланста булырга тиеш: шөгыльгә дә, ял итүгә дә вакыт табарга кирәк. «Берүзеңә әзерләнергә кыен, чөнки фикер алышыр кеше дә, ярышыр кеше дә юк. Шуңа күрә үзегезгә бергә әзерләнергә уңайлы кеше табыгыз», — дип өстәде ул.

«Барысы да начар дип уйлаган идем»: Софья Баландина химиядә һәм рус теленнән югары нәтиҗәләр күрсәтте

Вахитов районының 116 нчы лицеен тәмамлаган Софья Баландина БДИга фәннәрне сигезенче сыйныфта ук сайлап куйган. Хыялын тормышка ашыру – табиб булу һәм медицина вузына керү өчен – кызга рус телен, химияне, биологияне һәм база математикасын тапшырырга кирәк була. Беренче ике предмет буенча Софья 100әр балл җыйды, биология буенча – 96, ә математика буенча тәмамлаучының эшен «биш»кә бәяләделәр.

10 нчы сыйныфтан Софья химия һәм биологиягә юнәлешле профильле сыйныфта укыган. Укытучылар белән бергә укучылар үткән темаларны кабатладылар һәм мәсьәләләрне чиштеләр. Чыгарылыш елыннан башлап, кыз параллель рәвештә онлайн-курсларда әзерләнә. «Укытучылар безгә катлаулы чорларда да ярдәм иттеләр һәм яхшы тапшыруга өндәделәр. Шуңа күрә башта мин үз-үземә яхшы, лаеклы баллар җыюны максат итеп куйдым», — дип искә ала Софья.

Химия буенча сынау имтиханнарында максималь баллар Софьяның үз көченә һәм белемнәренә ышанычын ныгытты. Шуңа да карамастан, БДИ тапшырганнан соң чыкканда, чыгарылыш сыйныф укучысы үзенең уңай нәтиҗәгә язганын сизмәгән.

«Нәтиҗәләрне ике атна көтү авыр – башка теләсә нинди уйлар керергә мөмкин. Химия буенча имтиханнан соң бер-ике атна узгач, мин максималь нәтиҗә булыр дип ышандым, ләкин баллар алганда йөрәк барыбер каты итеп тибә башлады. Ә рус теле һәм биология буенча нәтиҗәләрне көткәндә мин бик борчылдым һәм барысы да начар дип уйладым», – дип уртаклашты Софья Баландина.

Булачак унберенче сыйныф укучыларына мөрәҗәгать итеп, Софья уку һәм ял балансын сакларга, шулай ук тестларны төнлә хәл итмәскә киңәш итте. Имтиханнарга әзерлек вакытында ул Казанның яр буйларында ял иткән. Су янында баш ял итә, дип саный 100 балл җыйган укучы. Укудан ял итәргә яраткан мавыгулар һәм шәгыльләр, шулай ук якыннар белән вакыт үткәрү ярдәм итәчәк.

kzn.ru