Казан хәрби хезмәткәрләре гаиләләре бушлай озату хезмәтеннән файдалана ала

Казанда яшәүче һәм 10 яшькә кадәрге ике һәм аннан да күбрәк балигъ булмаган балалары булган хәрби хезмәткәрләрнең гаилә әгъзалары озату хезмәтеннән файдалана ала. Волонтерлар аларга аэропортка, автовокзалларга һәм тимер юл вокзалларына барырга булышачак.

Хезмәттән файдалану өчен казанлыларга «Игелекле Казан» коммерциягә нигезләнмәгән автоном оешмасына +7(843)558-74-18 кайнар линия телефоны буенча шалтыратырга кирәк. Шулай ук Сеченов урамы, 5 адресы буенча барып, шәхсән мөрәҗәгать итәргә дә була.

Исегезгә төшерәбез, Казанда махсус хәрби операциядә катнашучы хәрби хезмәткәрләрнең гаиләләренә адреслы ярдәм күрсәтелә. Мобилизациягә эләгүчеләрнең гаиләләрендә тәрбияләнүче балалар 1711 транспорт картасы алган, алар ярдәмендә 67 мең бушлай сәяхәт кылган. Моннан тыш, «Батыр» картасы буенча 25 мең тапкыр балалар спорткомплексларда, музейларда, концертларда, цирк тамашаларында булган. «Игелекле Казан» кайнар линиясе белгечләре 4 меңнән артык шалтырату кабул иткән, ә психологлар шәхси һәм төркемле консультацияләр уздыра.

kzn.ru